Atualità
Al é jü online le geoportal nü, Deeg: „Aministraziun tres plü digitala“
Dal teritore al paesaje, dal cataster ales strades, dales misciuns ales localités. Bëgn 180 é les series de dac desponibles sön la plata internet nöia geoportale.retecivica.bz.it che é online da incö (14 de má). „Al se trata de n vare inant dër important – á splighé l’assessuria Waltraud Deeg – tla direziun de n’aministraziun tres plü digitala.“
Al é online da incö, mercui ai 14 de má, le geoportal nü dla Provinzia che cöi adöm düc i dac „open“ metüs a desposiziun dal’Aministraziun provinziala, dal Consorz di Comuns, dala Cité da Balsan y dal’EURAC. La plata nöia, che é gnüda planificada dal Südtirol Informatik AG (SIAG), á la misciun geoportale.retecivica.bz.it. Por l’assessuria por l’informatica Waltraud Deeg „é chësc n vare important tla direziun de n’aministraziun publica tres plü digitala. Al se trata de n gran proiet – á splighé l’assessuria Deeg – deache al mët a desposiziun na gran seria de dac d’ütl nia ma por i zitadins, mo ince por les imprejes y i profescionisć.“
Le geoportal nü fej pert dla strategia de svilup „Südtirol digital 2020“ , sciöche al spliga le diretur dla Repartiziun Informatica Kurt Pöhl che sotlignëia che le proiet se basëia söi trëi pilastri dla partezipaziun, dla segurëza y dla trasparënza. Indöt él gnü colié 180 series de dac tres na rëi de colaboraziun. La maiú pert dles series di dac é debann y á na lizënza „free“: dal teritore al paesaje, dal cataster ales strades, dales misciuns ales localités.
La novité plü grana é che la plata nöia geoportale.retecivica.bz.it é despartida te döes seziuns. La pröma seziun pormët da desćiarié de plü documënc y é ponsada dantadöt por privac, la secunda seziun indere é plü tecnica y reverda de plü les imprejes. N ejëmpl? Por düc chi che oress realisé n portal turistich y avëi azes a dac tres ajorná sön i percursc y les misciuns podará anuzé debann dötes les informaziuns tres le geoportal. N ater vantaje é ince la scemplité d’adoranza dl portal, che te püc tlics pormët la visualisaziun, por ejëmpl, de n plann urbanistich de n Comun dl Südtirol.
La rapresentaziun ofiziala dla plata internet geoportale.retecivica.bz.it gnará tignida en sabeda a Balsan cun le Hackaton 2015, na scomenciadia de competiziun danter porgramadus da döt le monn. „Chësc proiet che reverda i opendata é ma n pröm vare, y i sperun da podëi daurí l’azes a plü series de dac che é atualmënter blocades por chestiuns tecniches o de privacy.“
rc
