Atualità
Autonomia: Kompatscher ti presentëia les novités al minister Kurz
Tratan la festa por i 60 agn dala firma dl Tratat de Stat austriach, á le presidënt dla Provinzia Arno Kompatscher incunté incö (15 de má) a Viena le minister di afars cun l'ester Sebastian Kurz. Le presidënt á ajorné le minister sön les tratatives cun le govern talian che reverda le svilup dl’autonomia do la vijita de Renzi a Balsan.
Ince le presidënt dla Provinzia Arno Kompatscher á tut per incö a Viena ala zerimonia cun chëra che la Republica austriaca á zelebré i 60 agn dal tratat de Stat che é gnü firmé ai 15 de má dl 1955 y che á restabilí n’Austria libera, sovrana y democratica.
Do la festa de zelebraziun él gnü a se le dé n’incuntada tl Ciastel de Belvedere danter le presidënt Kompatscher y le minister di afars cun l’ester Sebastian Kurz tratan chëra che le presidënt á informé le minister sön l’incuntada ai 5 de má a Balsan cun le premier Renzi. „Te n memorandum ún concordé cun Renzi les proscimes tapes por ajorné l’autonomia südtiroleja. Al se trata dantadöt da aprové cina la fin dl ann de plü normes d’atuaziun bele laurades fora“, á recordé Kompatscher.
Le presidënt ti á comuniché inant al minister Kurz che al é gnü concordé cun le premier l’istituziun de na mësa de discusciun danter le Stat y la Provinzia por armonisé le Statut d’autonomia cun les riformes costituzionales dl 2001 y dl 2015 por svilupé inant te na manira positiva l’autonomia se basan sön le regolamënt dl’acordanza da arjunje danter le Stat y la Provinzia.
rc
