Atualità
Rëi de colaboraziun por daidé i migranc tl Südtirol
L’assessuria por les politiches soziales Martha Stocker á stlarí incö , ai 18 de má, adöm ai rapresentanc dles assoziaziuns y di ënc de competënza, la situaziun sön l’acoliënza di migranc tl Südtirol. Tratan la conferënza él gnü porté dant i contignüs dl protocol de colaboraziun metü adöm por coordiné damí les ativités d’assistënza di migranc tl Südtirol.
Dui é i fenomens che por le momënt reverda i migranc che röia tl Südtirol: un reverda l’acoliënza de porsones che ti vëgn assegnades al Südtirol por via dla tlé de spartiziun nazionala y che röia te Provinzia por damané asil y che fej fora le 0,9 porcënt di migranc che damanda asil tla Talia. Insciö él indöt 472 porsones che á fat domanda do asil che sojornëia te Südtirol, 365 tl cheder dles cuotes statales y 107 ti „posć provinziai“ por chi che fej domanda do asil diretamënter söl post. Tratan che les domandes do asil vëgn ejaminades, chësc döra de norma dai 12 ai 18 mëisc, él i migranc che sojornëia te cin' strotöres a Balsan y öna a Maran. Complessivamënter él gnü tut sö tl Südtirol indöt 3.000 migranc.
Por chëstes porsones, sciöche al á splighé l’assessuria Martha Stocker, vëgnel lauré fora adöm ai Comuns na mapa de spartiziun dles strotöres de acoliënza che dess gní spartides sö sön döta la Provinzia. Te döes edemes dess la mapa ester arjignada ca.
Le secundo fenomen reverda le porsones sön le iade dal Europa dl Sud tl vers di Paisc tl Europa dl Nord che s’archita tles staziuns dl Prener y a Balsan zënza orëi damané do asil tl Südtirol. Mesamënter él gnü registré dala Proteziun zivila tla staziuns dles ferates da Balsan le iade de zirca 110 porsones danter les 8 y les 11 (cun 11 operadus a desposiziun tratan le danmisdé) y zirca 25 porsones danter les 11 y les 19 (cun 6 operadus atifs). Tla staziun dl Prener é le valur mesan de 80 porsones al dé cun 3-4 operadus che é a desposziun por aiüc y domandes.
I migranc che é sön le iade danter Balsan y le Prener á sciöche obietif chël da jí inant y sües condiziuns é en general azetables. Le tlima danter i migranc y i operadus vëgn descrit sciöche adaté ala situaziun. I intervënc vëgn finanziá cun ressurses publiches, a chëres che al röia ciamó lapró i tröc aiüc da pert de privac, n segnal important dla sozieté zivila dl Südtirol. Tres na rëi de colaboraziun él sëgn gnü sotescrit n protocol de coordinaziun danter la Provinzia (Repartiziuns Politiches Soziales y Proteziun zivila), Volontarius, Caritas, Crusc Cöcena, Volontars autonoms che á sciöche obietif la mioraziun dla rëi de sostëgn. Sciöche al á splighé le diretur dla Repartiziun Politiches soziales Luca Critelli é le protocol n documënt „davert“ che po gní ajorné tresfora. Les aziuns desvalies tla staziun da Balsan vëgn coordinades da n colaboradu dl’assoziaziun Volontarius.
Günther Walcher, diretur dl Ofize Proteziun zivila dla Provinzia á informé che n colaboradu dla Proteziun zivila sará a desposiziun dl responsabl tla staziun por le monitoraje dla situaziun. Implü él ince gnü definí n terminn por n’incuntada cun le Commissariat dl Govern. Sciöche ince l’assessuria Stocker á sotligné él nezesciar de na coordinaziun cun les autorités statales.
Ala conferënza stampa da incö al tut pert l’assessuria Stocker, i funzionars dla Provinzia Critelli y Walcher, le presidënt dl’assoziaziun Volontarius Claudio Rotelli, Margherita Taras por la Crusc Cöcena, Alessia Fellin por la Carita y Verena Hafner sciöche rapresentanta di volontars autonoms.
rc
