Atualità
Dala Junta: Löm vërda al ddl sön l’intlujiun dles porsones cun handicap
La Junta provinziala á aprové incö (ai 19 de má) le dessëgn de lege sön la partezipaziun y l’intlujiun de porsones cun handicap. "La lege nöia á l’obietif prinzipal de mët al zënter dla sozieté les porsones cun handicap", á sotligné l’assessuria por les politiches soziales Martha Stocker incö tratan la conferënza stampa do l'aprovaziun da pert dla Junta.
Le respet dla dignité umana, l’autonomia y la liberté tles dezijiuns, degönes descriminaziuns, la partezipaziun ala vita soziala, l’avalianza dles oportunités y l’azessibilité: chisc é fins prinzipai dl dessëgn de lege nü aprové incö, mertesc ai 19 de má, dala Junta provinziala sön la partezipaziun y l'intlujiun dles porsones cun handicap. „Cun chësta lege nöia orun renforzé les capazités de dezijiun autonomes dles porsones cun handicap y insciö aumenté ince süa partezipaziun ala vita te familia y tla sozieté“, á recordé l’assessuria por les politiches soziales Martha Stocker incö tratan la conferënza stampa tradizionala do la sentada dla Junta.
La scomenciadia d'ajornamënt dla lege é stada nezesciara por adaté la lege provinziala dl 1983 ala Convenziun ONU dl 2006 sön i dërc dles porsones cun handicap y por strotoré les mosöres de sostëgn te na forma organica. „Por nos él sté important da öna na pert da tigní cunt dles esigënzes cuotidianes dles porsones interessades y de sües families y dal’atra pert da integré ince les propostes gnüdes a se le dé ti grups de laur desvalies y dles propostes da pert dles organisaziuns y di grups d’interes“, á splighé l’assessuria.
Danter les priorités dl dessëgn de lege él da ciafé l’inserimënt definitif tl monn dl laur. „L’acompagnamënt dla porsona cun handicap tl monn dl laur ne se röia nia cun la contlujiun de n proiet mo al va inant cina l’assunziun definitiva“, á dit Stocker. Le ddl prevëiga implü mosöres de assistënza tles scolines y tles strotöres por pici cun personal cualifiché (cina sëgn ê le sostëgn ma preodü tles strotöres aziendales), la colaboraziun cun la LUB por ci che reverda l’azes a programs de stüde, l’oblianza por i ënc publics da avëi cuotes de finanziamënt spezifiches por cooperatives soziales dla tipologia B, le sostëgn a scomenciadies por aumenté l’autonomia dl abité dles porsones cun handicap y l’istituziun de n Osservatore provinzial sön i handicap. „Por dötes chëstes mosöres á la Junta preodü chësc ann n investimënt de 3,4 miliuns de euro, de chisc 1,2 miliuns por les mosöres de sostëgn nöies“, á prezisé Stocker.
Insciö él preodü de plü mosöres de mioramënt ti seturs dl’intlujiun te familia, dl’istruziun y dla formaziun, sön le post de laur, pro l’abité, la sanité, la cultura y le tëmp lëde, sciöche ince tl turism. Le dessëgn de lege contëgn implü diretives che reverda la mobilité y la partezipaziun ales dezijiuns dles porsones cun handicap. „Le test de lege ará döes formulaziuns: chëra tlassica y na secunda formulaziun scëmpla y tlera, che gnará presentada plü inant te na conferënza stampa“, á stlüt jö l’assessuria Stocker. Do l’aprovaziun da incö da pert dla Junta jará le test inant al Consëi provinzial por l’ejaminaziun da pert dla comisciun legislativa competënta denant co rové tl plenum.
rc
