Atualità
Danter passà y daunì: festa di 60 ani dl ITE Raetia de Urtijëi
Inuvatif, plurilinguistich, cuscient dla tradizions y lià ala vita soziela y economica dla valeda y ala particulariteies linguistiches y cultureles de Südtirol: l ITE Raetia à ncuei (22/05) festejà si 60 ani de atività. „Trëi sezions y leprò na bela cumpëida de ufiertes furmatives,dut chësc à purtà pro che la scola ie deventeda na istituzion scialdi moderna," nsci dij l assessëur Florian Mussner.
L ITE Raetia de Urtijëi ie nasciù tl ann 1954 coche sezion dla scola auta cumerziela de Bulsan. Cin ani plu tert cun l decret dl Presidënt dla Republica, ai 21 de lugio iel unì metù su l ITC Raetia de Urtijëi cun na direzion ndependënta. Danter la tapes de majera mpurtanza de chësta scola iel zënzauter da lecurdé l purté inant l model paritetich ladin cun l segondo Statut d’autonomia tl ann 1972, la ntroduzion de una n’ëura y dopro de doi ëures de rujeneda y cultura ladina y la costruzion dl fabricat nuef tl ann 2008. Un di vares arjonc ultimamënter ie chël dla giaurida de na terza sezion dedicheda al sport, data pro ufizialmënter dal guviern pruvinziel tl ann 2014, dlongia la doi sezions „Aministrazion, finanzes y marketing“ y „Turism“ che fova bele dant.
„Cun chësta ufierta slargëda ora possa la scola dantaldut tenì cont di debujëns de Gherdëina y ti dé ai sculeies y ala sculées la puscibltà de giaté nia dalonc da cësa na furmazion rica de cuntenuc sibe tla teoria che tla pratica cun d’uni sort de proiec tl ciamp plurilinguistich y tla tecnologies nfurmatiches. Da auzé ora iel la bona culaburazion danter la firmes dl luech y dla valeda y la lies dal sport, ulache i sculeies y la sculées possa mëter n droa chël che n à mparà a scola y se njinië ca bën per jì tl mond dl lëur o jì inant cun l stude“, nsci dij l Assessëur Florian Mussner. L model paritetich, cun l nseniamënt per tudësch, talian y ladin, se à cunservà bën ënghe tla scoles autes y ti à judà ai jëuni a se fé plu saurì a mparé d’autra rujenedes coche nglëisc, spanuel y rus“, njonta Mussner.
„L ITE Raetia se à svilupà bën y ie na pert fundamentela dl’ufierta scolastica dla valedes ladines desmustran for inò de ti vester ala mudazions y de se lië ala cundizions economiches y sozieles da tlo cialan de les ntegré tl nseniamënt“, dij l Ntendënt dla scoles de Gherdëina y dla Val Badia Roland Verra, che sotrissea, che l aumënt dla iscrizions ie na desmustrazion cuncreta de chësc.
„Cun la ntroduzion dl’ublianza de jì a scola nchin ai 16 ani y dl’ublianza de furmazion nchin ai18 ani iel de gran mpurtanza de avëi ënghe pusciblteies de jì a scola dlongia cësa y l nes savëssa bel, sce chëstes unissa nuzedes, ajache l ITE Raetia porta de gran vantajes nia mé per l sculé y la sculea, ma nce per la vita soziela dl luech y per la families dla valedes ladines“, dij l diretëur dla scola Bruno Senoner.
L diretëur ie scialdi cuntënt che l ann passà à la scola arjont la bela cumpëida de 1000 sculeies y sculées che à stlut ju chësta scola, desmustran nsci che l se à paià a mëter a despusizion mesuns y ressorses, che ie na fundamënta per l daunì dla scola.
Tla trëi direzions de scoles autes ladines, che ie l ITE Istitut Tecnich Economich „Raetia“, l Lizeum d’ert cun Scola prufesciunela per l artejanat artistich - “Cademia” y le Zënter dla scoles autes ladines da La Ila, iel chëst ann (2014/15) 518 scric ite, per l ann che vën se à per ntant scrit ite passa 530 sculeies y sculées.
Ntan la festa da ncuei à la cumenanza de scola ulù lecurdé i 60 ani passei s’la ciaculan danter sculeies y sculées d’al didancuei y da plu giut, cun videos, pec de teater y prejentan proiec atuei. N valguni sculeies y n valguna sculées d’al didancuei y da plu da giut à purté dant ntan la festa si mprescions y si lecorc. Ntan la festa an pudù scuté su la grupa de mujiga dla scola „Cominais", che à sunà drët bel. Per chësta ucajion an dat ora n’edizion particulera dla zaita de scola „Orange Juice".
rc
Galaria dales fotografies
