Atualità
Lizeum d’ert Cademia: Daurida la mostra d’ert “42 augen occhi uedli”
Motivé les potenzialités artistiches di studënc y stimolé l’interes dla popolaziun sön i resultac dles scores altes ladines: la mostra d’ert „42 uedli – occhi – augen“ é na racoiüda d’operes d’ert de 21 studënc dla Scora d’Ert „Cademia“ che é gnüda daurida inier, ai 21 de ma tl salf dles mostres dla Lia mostra d’ert de Urtijëi. La mostra sará da odëi cina ai 4 de jügn, l’ingres é debann.
Por incorajé la creativitá artistica di studënc y dles studëntes dla cuinta classa dl Lizeum d’Ert Cademia á la scora metü da jí, adöm ala Lia mostra d’ert da Urtijëi, n proiet artistich por plü mëisc. Tratan chësc proiet á i studënc y les studëntes lauré fora 21 creaziuns artistiches che ti é gnüdes presentades inier, jöbia ai 21 de ma, por le pröm iade al publich. „Al é dagnora n plajëi podëi inaudé na mostra cun operes d’ert svilupades dai studënc y dales studëntes instësses. I insegnanc y les insegnantes dla Scora d’Ert á dagnora incorajé i studënc da chirí le contat cun le publich y l'organisaziun de mostres é n impuls important te chësc vers“, á dit l’intendënt dles scores ladines Roland Verra. „Le titul dla mostra ’42 uedli – occhi – augen’ descrii les vijiuns d’ert desfarëntes di 21 studënc y studëntes tres na racoiüda de operes d’ert figurativa, de design y de grafica“, á splighé l’insegnanta Verena Costamoling, coordinandëssa dl proiet y dles materies artistiches dla Scora d'Ert.
Por düc i interessá: la mostra restará daverta tl salf dles mostres dla Lia mostra d’ert de Urtijëi (plaza S.Antone) cina ai 4 de jügn, vigni dé dales 10.30 ales 12.30 y dales 16.00 ales 19.00. La jöbia, le vëndres y la sabeda ince dales 20.00 ales 22.00.
rc
