Atualità
Dala Junta: le fonds de rotaziun vëgn indô daurí
Imprësć alisirá dal fonds de rotaziun, bandides y contribuc direc: chisc é i trëi pilastri dl sistem de sostëgn nü por ti dé na sbürla al'economia dla Provinzia de Balsan. Incö á la Junta tut la dezijiun da daurí indô le fonds de rotaziun por domandes d’azes dai seturs dl’industria, artejanat, comerz y sorvisc. La deliberaziun stabilësc ince danü i limic d’investimënt y le tët di contribuc.
Renforzé les imprejes locales y sostigní la chersciüda dl sistem economich por ci che reverda na sostenibilité finanziara a dorada lungia: chëstes é stades les priorités prinzipales dla Junta provinziala pro l’elaboraziun de n sistem de sostëgn nü por ti dé na sbürla al’economia dl Südtirol. La fondamënta dl sistem de sostëgn ajorné reverda danter l'ater l’azes a imprësć alisirá dal fonds de rotaziun, che á na dotaziun atuala de 180 miliuns de euro. Öna dles priorités dl esecutif de Kompatscher é tres sté chël da smendrí i tëmp de speta pro l’ejaminaziun dles domandes, y propi por chësta gaujia êl gnü stlüt l’azes al fonds de rotaziun. Do avëi indô „daurí“ l’ann passé le fonds por le setur dl turism, á la Junta daurí incö le fonds ince por domandes d’azes dai seturs dl’industria, dl artejanat, dl comerz y di sorvisc aldinfora dl turism. Le regolamënt nü prevëiga na seria de mudaziuns y alisiraziuns por ci che reverda i tëmps de speta y i limic di imprësć.
Sce cun la normativa dl 2013 êl preodü indöt 11 modui de contribuziun desfarënc danter le 10 y le 80 porcënt di investimënc, nen restel sëgn ma plü trëi: 50 porcënt cina a 20 agn de dorada dl imprëst, 55 porcënt por imprësć che döra 15 agn y 60 % por i imprësć che döra diesc agn. Por les imprejes cun de manco de 50 dependënc él implü gnü stabilí n tët de investimënc de 1,2 miliuns, por imprejes plü granes (sura i 50 dependënc) pó rové chësc tët cina ai 2 miliuns de euro.
I criters nüs consënt ince da presenté danü domandes d’azes ai imprësć alisirá dal fonds de rotaziun por investimënc ambientai te implanc y mascins y che ê gnüs tuc demez dan da cater agn tl 2011. Indere por ci che reverda le problem dla licuidité esun passá da na norma che stabilî n import mascimal de 50mile euro te 7 agn a n tët de 80mile euro te 10 agn. L’ultima novité reverda i imobiliars: al é gnü daurí danü le fonds de rotaziun por i investimënc che reverda la cumpra, la costruziun, l’ampliamënt de frabicac, scöche ince la cumpra de zones por insediamënc produtifs.
rc
