Atualità
Start por le program FESR 2020: 136 miliuns por chersciüda y ocupaziun
Incö (ai 27 de ma) él pié ia a Balsan le program dl Fonds europeich por le svilup regional (FESR) che prevëiga na soma d’investimënc de 136 miliuns de euro (63 inplü en confrunt al program da denant) por la chersciüda dl’economia y dl setur dl laur local tla perioda danter le 2014 cina l’ann 2020. Cater é i pilastri prinzipai dl program.
Archirida y inovaziun, svilup digital, ambiënt sostenibl y proteziun dl teritore é i cater pilastri prinzipai dl program dl Fonds europeich por le svilup regional FESR 2014-2020 presenté incö a Balsan dal presidënt dla Provinzia Arno Kompatscher,adöm cun le diretur de Repartiziun Graziano Molon. „Cun le program FESR ti gnarál dé impulsc importanc al’economia locala por podëi garantí tl dagní investimënc importanc por les imprejes locales, por aumenté la cualité de vita di zitadins y por sostigní la sconanza dl ambiënt y la competitivité dla regiun dl Südtirol“, insciö le presidënt Arno Kompatscher.
Tla perioda danter le 2014 y le 2020 él a desposiziun la soma d’investimënc de 136 miliuns de euro che vëgn por le 50 porcënt dala Uniun Europeica, 35 porcënt da fonds statai y 15 porcënt dala Provinzia de Balsan. Insciö pól gní metü a desposiziun 63 miliuns de plü en confrunt al program FESR 2007 – 2013. I obietifs dl program a livel provinzial é danter l’ater le sostëgn al’archirida, le svilup tecnologich y dl’inovaziun, la mioraziun dla cualité dles tecnologies d’informaziun y de comunicaziun, le smendrimënt dles emisciuns de anidride carbonica, l’aumënt dl’efiziënza energetica y l’eliminaziun di prighi naturai. Kompatscher á invié dötes les assoziaziuns, ënc, cooperatives y düc i interessá da fá para ales bandides y da presenté proiec, deache i fonds dl FESR é na gran ocajiun por l’economia locala y che pormët investimënc de dorada lungia tles infrastrotöres locales.
Le pröm pilaster (archirida y inovaziun) dl program FESR á danter i obietifs chi da potenzié les capazités d’ezelënza tl svilup dla R&I y da aumenté l’ativité d’inovaziun dles imprejes. Por ci che reverda la realisaziun, él preodü da avëi 80 esperc d'archirida te infrastrotöres miorades, da realisé na rëi de colaboraziuns de almano 50-60 imprejes cun istituc d’archirida y da sostigní zirca 230 imprejes pro sü proiec d'inovaziun. La dotaziun finanziara é de zirca 32,8 miliuns de euro.
Le secundo pilaster (svilup digital) á sciöche obietifs chi da smendrí la desfarënzia digitala danter les zones desvalies südtirolejes y da aumenté la defujiun di sorvisc digitai dl Aministraziun publica. Sciöche resultat él preodü da avëi n aumënt de plü de 600 imprejes che anuzëia la fira otica, 15 sistems d’informaziun nüs y n zënter por la gestiun de dac y informaziuns. La dotaziun finanziara por chësc pilaster é de zirca 32,8 miliuns de euro.
Le terzo pilaster (ambiënt sostenibl) á l’obietif da smendrí le consum energetich di frabicac publics y da aumenté la mobilité sostenibla tles zones dalunc dai zëntri. Danter i indicadus che dess desmostré i resultac él gnü inserí la cuantité de 300 unités abitatives cun classificaziun dl consum energetich miorada, n mënder consum energetich ti frabicac publics de 767.000 Kwh al ann, la diminuziun dl consum de anidride carbonica al’ann por n valur de 139 tonelades. La dotaziun finanziara é de 39,3 miliuns de euro.
Le cuarto pilaster (proteziun dl teritore) reverda la smendrimënt dl prigo idrogeologich y de erojiun dl patrimone alpin. I obietifs é chi da arjunje 400 metri linears de stuades, da costruí mosöres de proteziun por prësc 50.000 porsones cuntra les agajuns y da realisé 10 sistems d’informaziun nüs. La dotaziun finanziara é de 26,2 miliuns de euro. Al röia ciamo lapró n cuinto pilaster che reverda l’assistënza tecnica (atuaziun, monitoraje, valutaziun y control) che é doté de 5,4 miliuns de euro.
L’orientamënt nü dla politica regionala dl’Uniun europeica é gnüda portada dant tratan la manifestaziun de ajornamënt incö a Balsan da Martin Bugelli dla Comisciun europeica. L’acordanza de partezipaziun danter l’Uniun europeica y la Talia é stada la tematica zentrala dl referat de Giorgio Martini dl’Agenzia de coejiun. Implü á Peter Gamper dla Repartiziun Europa presenté al publich i contignüs y l’aplicaziun dl program FESR. Dötes les informaziuns nezesciares sön le program FESR nü é desponibles sot ala misciun: http://www.provincia.bz.it/europa/it/finanziamenti-ue/FESR-2014-2020.asp.
rc
Galaria dales fotografies
