Atualità
Südtirol Pass abo+: Dal 1. de jügn domanda online
Da en lönesc, al 1. de jügn dl 2015 pól ma plü gní arlungé o damané do le Südtirol Pass abo+ por l'ann de scora o de stüde online sön la plata internet http://www.suedtirolmobil.info/. „A chësta moda vëgnel smendrí la burocrazia por les families, les scores y l'aministraziun publica y an sciafia da ciafé l'abo te cört tëmp", sotrissëia l'assessur por la Mobilité Florian Mussner.
Al momënt él te döta la provinzia rodunt 73.000 abo+ de scolars y scolares dla scora elementara, dla scora mesana y dla scora alta, sciöche ince de studënc y studëntes dla scora profescionala a tëmp plëgn, che ê cina sëgn debann, y ca 7.000 abo+ de studënc y studëntes, lerneri y lerneres; düc chisc abos vel ciamó cina ai 15 de setëmber dl 2015.
Dal proscimo ann de scora 2015/2016 mësson paié por i abos di scolars y dles scolares na soma pausciala al ann de 20 euro aladô dla deliberaziun dla junta provinziala; l'abo por studënc y studëntes, lerneri y lerneres costa inant sciöche denant 150 euro al ann. La domanda aposta pó gní fata dal 1. de jügn dl 2015 online: por scolars y scolares de mëndra eté da n genitur o na porsona autorisada al'educaziun; i studënc y les studëntes che á complí 18 agn fej intësc domanda. Le abo+ por le proscimo ann de scora vel impormó canche al vëgn paié ite la soma pausciala al ann. L'ultimo termin por fá domanda é ai 31 de dezëmber dl 2015.
La soma pausciala al ann pó gní paiada ite insciö:
- online cun cherta de credit
- tres internet-banking tles banches autorisades; dal 1. de jügn inant tla Banca popolara dl Südtirol y tla Cassa Raiffeisen, tosc ince tla Cassa dl Sparagn dl Südtirol;
- pro dötes les portines autorisades y pro düc i posć de venüda dl Trasport Integré dl Südtirol
- tres ordin permanënt tla banca (SEPA Direct Debit)
An mëss tres ciamó paié 20 euro por ciafé n duplicat sce l'abo+ vëgn rot o sce an le perd. L'abo+ vëgn ma fat do danü debann sce n'é nia rot, mo al ne funzionëia impó nia.
Por l'abo+ pól te vigni momënt gní ativé na funziun de paiamënt implü, por ejëmpl por se tó para la roda, o n tier, o jí cun le Nightliner, sciöche ince por jí cun la ferata cina Desproch y Lienz (la trassa tl'Austria cun la tarifa dla ÖBB). Chisc abos cun funziun de paiamënt pó spo gní adorá avisa sciöche n Südtirol Pass normal. Ince les modalités de paiamënt é les medemes sciöche pro le Südtirol Pass (chertes da ciarié sö o paiamënt tres la banca).
usp
