Atualità
"Vera tles Alpes": Presentaziun dl liber cun referac cörc tla Teßmann
A na sëra d’informaziun cun la presentaziun de n liber nü y de plü referac cörc sön la Pröma Vera Mondiala inviëia la Biblioteca provinziala Teßmann de Balsan ai 09 de jügn dales 20.00 inant. Adöm cun i editurs sarál ince presënc i trëi assessurs por la cultura.
Cun l'entrada te vera dla Talia de ma dl 2015 s'ál daurí tl zënter dl'Europa n frunt nü che ê dî alalungia gnü trascuré dala storiografia dla vera mondiala. Porchël rapresentëia la publicaziun nöia dal titul „Der Erste Weltkrieg in transnationaler Perspektive“ (La Pröma vera te na prospetiva transnazionala) n contribut important por analisé la vera austriach-taliana tles Alpes y dlungia l'Isonzo. Storiches competëntes y storics competënc dl'Austria, dla Germania y dla Talia se dá jö - te stories paraleles - cun sis tematiches zentrales dla storia dla Gran Vera ti dui stac: cun la funziun dl govern y dla politica, la strategia de vera militara, la storia dles esperiënzes di soldas, la storia dla mobilisaziun soziala y dla propaganda, sciöche ince cun le recort dla vera y la storiografia cina al dedaincö.
Le liber nü gnará presenté dal editur Oswald Überegger dl Zënter de competënza de storia regionala dl'Université Lëdia de Balsan. Tratan la sëra él ince preodü dui referac cörc di esperc de storia Werner Suppanz (Université de Graz) y Nicola Labanca (Université de Siena) che analisará plü avisa la tematica dla comemoraziun dla Gran Vera tl'Austria y tla Talia (1915–2015). I dui storics dla Gran Vera é dër conesciüs y dará na vijiun generala sön 100 agn de storia de comemoraziun.
Parores de salüt gnará portades dant dal assessur por la scora y cultura ladina Florian Mussner, dai assessurs por la scora taliana y todëscia, Christian Tommasini y Philipp Achammer, sciöche ince dal retur dl'Université lëdia de Balsan Walter Lorenz.
La manifestaziun dla Biblioteca Provinziala Dr. Friedrich Teßmann en colaboraziun cun le Zënter de competënza de storia regionala dl'Université Lëdia de Balsan y de storia y regiun, gnará tignida
en mertesc, ai 9 de jügn,
dales 20.00
tla Biblioteca provinziala „Friedrich TeßmanN“
strada Armando Diaz 8
a Balsan.
Telefon 0471 471814, E-Mail info@tessmann.it; http://www.tessmann.it/
rc
