Atualità
Val Badia: Laurs por aumenté la proteziun da roes y dal’ega alta
De plü cantiers ti Comuns de Corvara, Badia y Mareo é gnüs vijitá inier, jöbia ai 4 de jügn, dal diretur de departimënt Klaus Unterweger y dal diretur de repartiziun Rudolf Pollinger. A Corvara y Badia vëgnel porté inant i laurs de proteziun dales roes, tl Comun de Mareo vëgnel lauré por smendrí i prighi dl’ega alta.
La pröma vijita é gnüda fata dai esperc tles localités "Pre de Surega" y a "Burjè" olache la gran ro de "Crëp de Sela" é ruvada jö danter Corvara y Calfosch. Deache al s’â deleghé na gran cuantité de nëi y por la tröpa ega da plöia tl terac s’âl metü en movimënt dai 27 ai 29 de aurí dl 2014 na ro dlungia Crëp de Sela, sot al Boè, danter Corvara y Calfosch che s’â spo despartí te döes lënghes che gnô cuntra la val y â metü en pericul n hotel, ciases privates y l’areal di soldas „Villaggio alpino“. Por stravardé les localités tl dagní da chësc prigo á l'Ofize sistemaziun de rüs de munt y paralovines ost dla Repartiziun Costruziuns idrauliches costruí n sbaramënt de deviaziun sura la trassa dl implant portamunt y á modelé le raiun, por ti dé a na ro eventuala tl dagní na direziun prestabilida y por garantí n deflus dl’ega dla plöia diretamënter tla Gadera sot ala strada statala fora. L’ofize á implü realisé drenajes por mët en segurëza y tigní frëma la cuantité de material che s’â sposté cun la ro. Al é ciamó preodü la realisaziun de na vasca de racoiüda, olache le material de na ro eventuala dess rové adöm. Le finanziamënt dles costruziuns é garantí dala Proteziun zivila y prevëiga na spëisa de 400.000 euro. Le responsabl dl proiet y dla direziun di laurs é le diretur dl Ofize Sandro Gius, dla realisaziun di laurs se fistidiëia Markus Passler cun sü colaboradus.
N ater avenimënt che á spordü dassën la Val Badia é stada la gran ro a Badia ai 13 de dezëmder dl 2012 che ê jüda jö dlungia la localité de Sottrù sön la pert ortograficamënter a man dërta, olache al s’â metü en movimënt material sön na spersa de sura 30 hectar y che manaciâ da rové jö tl rü dla Gadera. De plü porsones y families â pordü y messü lascé sües ciases y abitaziuns. Atira do la ro â l’Ofize sistemaziun de rüs de munt y paralovines ost dla Repartiziun Costruziuns idrauliches metü man da alisiré le fossé dl rü dal material tomé ite y da arlungié la condüta dal ega por rovëne y sposté le percurs dl rü. Por le momënt vëgnel efetué laurs por modelé le raiun che é gnü atoché dala ro y al vëgn ince realisé n sistem de drenaje por rovëne döta l’ega sura y sot tera diretamënter tla Gadera. La realisaziun de chëstes costruziuns de proteziun á na spëisa de 300.000 euro y vëgn finanziades dala Proteziun Zivila y dala Repartiziun Agricoltöra.
Por smendrí i prighi dl’ega alta por abitaziuns che é posizionades tla zona cöcena dl plann dles zones da prigo dl Comun de Mareo vëgnel arbassé y amplié le fossé dl rü d’Al Plan (olache chësc é poscibl) y alzé i mürs de proteziun dl rü. I cosć por chëstes operaziuns é de 150.000 euro.
rc
Galaria dales fotografies
Retrat: (USP/ Judith Weissensteiner)
