Atualità
Giaurida la oasa dl chiet di Banies de Razes
La funtana minerela de solper di Banies de Razes, che univa bele nuzeda tl dejedotejim secul per la cura de desturbs defrënc, ie inò davierta. Dan n valgun dis ie la oasa dl chiet nueva defati unida giaurida: l se trata dl diejim proiet (sun undesc) de chësta sort cumpletà tla Provinzia de Bulsan.
“Cun la oases dl chiet“ – à tlarì l diretëur dl Departimënt per l Svilup dl teritore, l Ambient y l’Energia, Florian Zerzer – “ulons lecurdé y valorisé la cultura di vedli banies storics y la varietà dl’eghes minereles tl Südtirol". Purtà inant vën chësc proiet dal Ufize Gestion ressurses d’ega y dala Repartizion Costruzions idrauliches n basa a n program de ressanamënt y captazion che à la mira de mëter a despusizion di vijitadëures chësta eghes particuleres te na luegia scialdi plajeivla y propi semienta a na vera oasa.
"I Banies de Razes” – dij l diretëur dl Ufize Gestion ressurses d’eghes Thomas Senoner – “à na tradizion che va de reviers al dejesetejim secul, y bele dal scumenciamënt incà univel nuzà doi funtanes minereles, chëla de solper y chëla de fier, per curé desturbs feminii, scrofolosa, reumatism, mel ala lesures y deblëza de nierves". Do che l fova unit ju na smueia ie la funtana cun ega da fier unida curida defin tl 2002 lascian da garat mé plu la funtana cun ega da solper che bloca ora da na buja tl crëp y che ie dan n valgun mënsc unida capteda sciche l se toca y devieda tres cundotes de n 800 metri nchin ala oasa dl chiet, ulache na tofla de nfurmazion presentea n valgun dac n cont dla carateristiches y pruvenienza dl’ega.
La funtana de solper di Banies de Razes ie tlassificheda coche ega lesiermënter mineraliseda, y la cuntën dantaldut fluor, iod y solpri. L elemënt prinzipel dla 11 oases dl chiet (chëla di Banies de Razes ie la diejima) ie l droch, fat de na piera urnamentela, sciagumeda, che ie l simbul dla funtana: l se trata de na plata turonda realiseda cun n sas tipich dl raion. T’amez ora vën l’ega che, reguran tres trëi nrissedes vën ora te n pitl aghel. Per deplù nfurmazions sun la oasa dl chiet di Banies de Razes possen cialé do sun la plata dl’Agenzia per l ambient (per talian y tudësch)
Video oasa dl chiet di Banies de Razes
usp
