Atualità
Marce dl laur: aumënt lisier dl’ocupaziun dl Südtirol
Al é gnü presenté incö dal’assessuria Martha Stocker le raport sön le marcé dl laur tla Provinzia de Balsan che reverda la perioda dal novëmber 2014 al aurí 2015. Al é gnü registré n aumënt dl 0,8 porcënt dl’ocupaziun y na porcentuala de dejocupaziun de 4,6 porcënt, cun pröms segnai de chersciüda ti seturs dl turism y dl’agricoltöra cun le setur dl’edilizia che é ciamó en dificolté.
L’assessuria por le laur, Martha Stocker, le diretur dla Repartiziun Laur, Helmuth Sinn, y le diretur dl Osservatore dl marcé dl laur, Stefan Luther, á presenté incö danmisdé tratan na conferënza stampa i dac che reverda le marcé dl laur tla provinzia de Balsan tla perioda dal novëmber 2014 al aurí 2015. Les zifres presentades confermëia na chersciüda generala dl’ocupaziun, ince sce cun desfarënzies ti seturs desvalies.
Le dat plü relevant é l’aumënt dl’ocupaziun de 0,8 porcënt en confrunt ala medema perioda dl ann da denant, chël ó dí che chësc ann él 1477 porsones en plü cun n’ocupaziun. Tratan so intervënt á sotligné l’assessuria por le laur Martha Stocker che ince sce al é gnü costaté n aumënt dl 0,8 porcënt dl’ocupaziun él de gran desfarënzies da un n setur al ater.
I aumënc plü alc é gnüs registrá tl setur turistich hotelier (+3,1%), tl’agricoltöra (+2,6%) y tl lernerat (+6,2%). Nia tan alta é stada la chersciüda tl setur dl artejanat d’elaboraziun (+1,2%), tla sanité (+1,2%) tl’istruziun (+1,1%) y ti atri seturs privac zënza le comerz (+1,3%) y tl’assistënza soziala (+0,3%). Ti seturs dl’edilizia (-2%), dl’aministraziun publica (-0,8%) y dl comerz (-0,1%) é le svilup sté negatif. Do la minunga dl diretur dla Repartiziun Laur, Helmuth Sinn, pon lí fora dai dac che le marcé südtirolej se möi tres de plü fora dala crisa mo che le svilup ne é nia anfat te vigni setur.
La perzentuala de ocupaziun (dai 20 ai 64 agn) é söporjö söi 76,1 porcënt y chëra dla dejocupaziun é dl 4,6 porcënt. Inant vá le prozes de invedlamënt di lauranc tl marcé dl laur dl Südtirol. Tratan le semester d’analisa da novëmber 2014 al aurí 2015 él gnü registré mesamënter 47.619 lauranc cun 50 y plü agn. Complessivamënter él gnü costaté che le 25,5 porcënt di lauranc dependënc á almanco 50 agn (+1,8 porcënt en confrunt al ann da denant y +7,2 porcënt da dan da cinch agn).
En confrunt cun i raiuns vijins che á carateristiches geografiches, demografiches y economiches che ti somiëia al Südtirol – ince sce la perzentuala de ocupaziun é plü alta en confrunt cun la provinzia de Trënt – é i dac dl marcé dl laur tres ciamo plü basc co tl Tirol y tla Svizra.
Le diretur Sinn á ince fat n confrunt cun i dac dl marce dl laur dl mëis de ma, che segnalëia n aumënt de 1,2 % por ci che reverda l’ocupaziun confrontan cun le medemo mëis dl 2014, portan para na reduziun dla dejocupaziun dl 7 porcënt. Döt le raport cun düc i numeri che reverda le marcé dl laur tla Provinzia de Balsan é da ciafé sot a: http://www.provincia.bz.it/lavoro/mercato-del-lavoro/929.asp.
usp
