Atualità
A22, Kompatscher y Rossi da Delrio: vari inant tl vers de na soluziun
Le Minister por les infrastrotöres y le trasport Graziano Delrio á incunté incö danmisdé (10/06) a Roma i presidënc dles provinzies autonomes da Balsan Arno Kompatscher y da Trënt Ugo Rossi. L’incuntada é stada ütla por analisé la tematica dla conzesciun dl’A22 y les domandes gnüdes dala Comisciun europeica por ci che reverda la prorogaziun dl’autostrada dl Prener.
Tratan l’incuntada él gnü confermé l’orenté da trames les perts da ciafé na soluziun positiva ala chestiun che reverda la conzesciun de öna dles trates d’autostrada plü importantes dles Alpes. Le Minister y i presidënc é a öna por ci che reverda la poscibilité de na conzesciun „inhouse“, che portass para, tres le prinzip dla colaboraziun danter les aministraziuns publiches, a na surandada dla gestiun dal Minister ai ënc locai, y por vëi a n’impreja inhouse cun na partezipaziun completamënter publica. Al é insciö gnü dé löm vërda ala creaziun de n documënt d’acordanza danter le govern y les döes provinzies autonomes da arjigné ca tles poscimes edemes. „Chësta soluziun foss ince na premiaziun por n teritore che á lauré y laora dötaurela por n svilup dles infrastrotöres en acordanza cun les esigënzes dl’ecosistema sensibl sciöche chël alpin dl Südtirol“, á comenté Kompatscher.
rc
