Atualità
Pest Euregio por l’ambiënt 2015, iscriziuns cina ai 16 d’otober
L’ediziun nöia dl Pest Euregio por l’ambiënt 2015, le concurs sön l’ambiënt y sön la sostenibilité, vëgn planifiché danter l’ater dal Assessorat provinzial por l’ambiënt y é ponsé por döt le raiun dl’Euregio Tirol-Südtirol-Trentin. Les documentaziuns mëss gní dades jö cina ai 16 d’otober.
Le concurs Pest ambiënt Euregio á arjunt oramai bele süa setima ediziun. Tó pert al concurs pó dötes les porsones privates y iuridiches (imprejes, comuns, assoziaziuns, istituziuns, scores,…) residëntes o cun la sënta legala tl Tirol, tl Trentin y/o tl Südtirol. Al proiet vëgnel azeté documentaziuns cun idees, propostes, proiec, mo ince scomenciadies y provedimënc conrec che reverda la sconanza dl ambiënt. „L’obietif prinzipal dla bandida dl concurs – sotlignëia l’assessur provinzial por l’ambiënt Richard Theiner – é chëra da sensibilisé y da motivé por na sconanza dl ambiënt ativa che se coliëia ince cun l’inovaziun te chësc setur.“
Le pest é partí sö te döes categories: la pröma á inom „proiec y idees“ y reverda les propostes bele concretisades o ciamó da svilupé, la secunda categoria „impëgn y ativités“ trata indere prinzipalmënter de scomenciadies bele stlütes jö. Le modul de partezipaziun é a desposiziun sot a chësc link olache an pó ince ciafé les condiziuns de partezipaziun al concurs. Dötes les documentaziuns di proiec mëss gní dades jö alplü tert cina ai 16 d’otober dl 2015. Al é preodü pesć cun n valur complessif de 7mile euro. Plü informaziuns pon ciafé sot a: www.transkom.it.
rc
