Atualità
Violënza sön jënt atempada: da n ann aiüc sot al numer vërt 800 001 800
Dal mëis de ma dl 2014 él atif le numer vërt 800 001 800 tres chël che porsones atempades che é vitimes de violënza (mo ince por testimoni de violënza) pó damané aiüt. Dan l’aniversar dl Dé mondial cuntra la violënza sön porsones atempades á l’assessuria Martha Stocker fat n ressüme dl pröm ann do l’ativaziun dl numer.
L’assessuria por les politiches soziales Martha Stocker á sotligné la pluralité de formes de violënza cunta jënt atempada. „Al se trata de violënza danter y cuntra porsones atempades“, á splighé l’assessuria incö (11/06) tratan la conferënza stampa. Te chësc contest él important da sotligné ince le druch y les fadies dla parentela y dl personal de cura che laora te na profesciun che ghira dër tröp dal singul, insciö l’assessuria.
Informé, cherié cosciënza, antergní la violënza (fisica y verbala) y la evité: chisc é stá i obietifs dl program Interreg en colaboraziun danter le Tirol y le Südtirol che é pié ia tl 2012. La direturia dl Ofize Jënt atempada y dl raiun soziosanitar Brigitte Waldner á recordé che al é gnü lauré l’ann passé tres n aziun cun placac, na brosciüra d’informaziun por personal de cura ti raiuns dla sanité y n jorantin por la popolaziun. Da n ann él ince atif le numer vërt 800 001 800 dl raiun sanitar de Balsan, olache al pó cherdé sö vitimes y/o testimoni de violënza sön jënt atempada. Tres le numer vërt vëgnel dé inant informaziuns ütles söi sorvisc de aiüt dla Provinzia y sön co se mët en contat cun les istituziuns competëntes tla vijinanza. La direturia de ofize Waldner á sotligné che al é ciamó tröp da fá deache „tröpes situaziuns violëntes vëgn ciamó odüdes sciöche normales.“
Le diretur dl’Aziënda por sorvisc soziai da Balsan Bruno Marcato á fat n ressüme dles esperiënzes dl pröm ann dal’ativaziun dl numer vërt, che vëgn manajé dal’Aziënda sön inciaria dla Provinzia. „Nostes colaboradësses respogn dal lönesc al vëndres dales 09.00 ales 12.00 sciöche ince la jöbia domisdé dales 14.00 ales 16.00. Aldinfora de chisc orars vëgnel garantí n sorvisc de re-call“, á splighé Marcato. L’Aziënda laora ince por aumenté la colaboraziun cun les istituziuns locales. Dal mëis de ma dl 2014 cina le mëis de jügn dl 2015 él gnü registré tres le numer vërt 48 telefonades cun incër 40 porsones che â da nen fá diretamënter o indiretamënter cun la problematica. Informaziuns pó gní damanades nia ma tres le numer vërt, mo ince vijitan la plata internet www.gewaltimalter.eu o tres la misciun email gewaltimalter@sozialbetrieb.bz.it. Sön la plata internet dl proiet pon ciafé tröpes informaziuns, articui, intervistes, videos sön la tematica dla violënza sön les porsones atempades.
Contignüs mediai:
Video: http://we.tl/XUQjT0wbUV
Intervista Martha Stocker: http://we.tl/NJxO5Ra7kD
Intervista Brigitte Waldner: http://we.tl/9oHZ3FIZy1
Intervista Claudia Trombini: http://we.tl/Zee0sV3IbO
Intervista Bruno Marcato: http://we.tl/KoOdngDdEB
rc
Galaria dales fotografies
