Atualità
Presentaziun dl diretur general nü dl’aziënda sanitara dl Südtirol
Le diretur general nü dl’Aziënda sanitara dl Südtirol Thomas Schäl metará man süa inciaria en lönesc, ai 15 de jügn. Incö, vëndres ai 12 de jügn s’ál presenté te na conferënza stampa ai media. „L’obietif é chël da condüj inant n sistem dla sanité che funzionëia bun y dal svilupé do les linies stabilides dala politica“, á sotligné Schäl.
Le diretur general nü dl’Aziënda sanitara dl Südtirol é gnü nominé tres n concurs internazional scrit fora dala Provinzia. „La sora ghiranza che i á fat sciöche assessuria é stada chëra che la comisciun ess dé jö n arat tler“, á sotligné l’assessuria por la sanité Martha Stocker tratan la conferënza stampa da incö (12/06). La comisciun d’esperc á nominé sciöche su candidat por le post da diretur general nü Schäl, che é spó gnü nominé dala Junta provinziala. Schäl porta para, do l’arat di esperc y dla Junta provinziala, les carateristiches por l'inciaria cun na formaziun da injenier y da informatich dl’economia. Schäl á ince tröpes espriënzes de gestiun de plü aziëndes sanitares. L’assessuria Stocker á sotligné che: „La ghiranza de nos düc é chëra da svilupé inant a bëgn de düc i zitadins le sistem sanitar dl Südtirol.“
Tratan süa presentaziun é le diretur general nü jü ite sön süa posiziun danter l'aministraziun y la politica, spligan les linies prinzipales dl conzet dla reforma dl’Assistënza sanitara 2020 y les sfidades plü importantes che l'aspetará. „Mi obietif é chël da porté le sistem sanitar dl Südtirol al pröm post en confrunt ai sitems nazionai y internazionai“, á recordé Schäl sotlignan che al é completamënter a öna cun düc i punc dl conzet dl’Assistënza sanitara 2020. Le diretur general é ince jü ite sön i proscims vari che reverda la reforma sanitara: „Le prozes de reorganisaziun dla sanité dl Südtirol reverda dui seturs: chël dl’aministraziun y chël di sorvisc sanitars. Düc i ospedai fej pert dl’assistënza sanitara, tres chëra che al messará gní garantí dantadöt la cualité dla cura y la sigurté di paziënc.“ Implü á Schäl ince sotligné l’importanza dl’informatica por le bun funzionamënt de n sistem sanitar, sides por ci che reverda l’assistënza di paziënc co ince la cura.
Le diretur general nü s’á bele incunté incö danmisdé cun le diretur da denant Andreas Fabi por traté de plü tematiches che reverda la sanité y s’incuntará tosc ince cun düc i direturs y suranstanc dles direziuns di raiuns.
Contignüs mediai:
conferënza stampa: http://we.tl/C7WHI9Ghvf
Intervista Martha Stocker: http://we.tl/yMhJz3CWKG
Intervista Thomas Schäl: http://we.tl/Ot4HzofQpE
contignsü audio: http://we.tl/XjU4TTxzZqrc
Galaria dales fotografies
Foto: USP/ohn
