Atualità
Lauré tl Paiern: incuntada d’informaziun por assistëntes di mituns (19/6)
Assistënc y assistëntes di mituns y mitans cun n titul de stüde südtirolej é dër damaná ince foradecá. Bele por le cuarto iade dal 2014 inant vëgnel organisé dal Zënter de mediaziun laur da Balsan n domisde d’informaziun por personal interessé a n post de laur tl Paiern o tla Germania. Le termin é ai 19 de jügn.
Dal 2013 inant él poscibl por assistënc y assitëntes de mituns y mitans y por educadësses cun cualifiches spezifiches da fá esperiënzes de laur tl Paiern y tla Germania. „Le Zënter de mediaziun dl laur da Balsan colaborëia bele da plü tëmp cun agenzies de colocamënt todësces y atualmënter vëgnel damané do figöres profescionales spezifiches“, spliga le diretur dla Repartiziun Laur Helmuth Sinn. Por i daturs de laur todësch ti somiëia la formaziun südtiroleja dër a chëra fata tla Germania y porchël vëgnel damané do figöres profescionales tl seturs dla sociopedagogia y dla pedagogia educativa, personal por l’assistënza di mituns y por l’integraziun de mituns cun handicaps. Les domandes pó ince gní fates da studënc dla facolté dles sciënzes dla formaziun dla LUB da Porsenú y dles scores provinziales por les profesciuns soziales.
La proscima incuntada d’informaziun sará
en vëndres ai 19 de jügn
dales 15.00
tl Zënter de mediaziun dl laur
tla strada via Gamper 1,
a Balsan
tratan chëra che les colaboradësses dla Repartiziun Laur y dles agenzies de colocamënt dla Germania presentará les oportunités de laur por assistëntes y educadësses di mituns tl Paiern. Por plü informaziuns prëibel contaté Alessandra Sartori dl Zënter de mediaziun dl laur, numer de telefonn 0471 418668.
rc
