Atualità
Dala Junta: ok al dessëgn de lege sön le sostëgn ales emitënzes privates
Garantí la pluralité dl’informaziun tl Südtirol: chësc é l’obietif prinzipal dla lege sön les telecomunicaziuns y sön les emitënzes privates che vá zoruch al 2002 y che é gnüda elaborada danü incö (16/06) dala Junta. Al é preodü n sistem nü y plü scëmpl cun alisiraziuns y n sostëgn finanziar anual de 1 n miliun de euro tl 2015 da ti assegné sciöche contribut ales emitënzes privates (ince online).
„Pluralité y liberté di media – á sotligné le presidënt dla Provinzia Arno Kompatscher – é na pert sostanziala de na sozieté democratica. Tl Südtirol él implü ciamó da tigní cunt dantadöt di aspec che reverda la sconanza dles realtés culturales y linguistiches, n valur che vëgn ince sotligné dal Statut d’autonomia. Al se trata chiló de ti garantí ala popolaziun l’azes a n’oferta d’informaziuns sön tematiches locales che sides independënta, plurala y completa.“ Por arjunje chësc obietif él gnü ratifiché tl 2002 la lege provinziala sön les „telecomunicaziuns y les sovenziuns tla materia dla radiodefujiun“ y che é gnüda adatada y atualisada sëgn tres na colaboraziun ampla cun i partners locai.
Döes é stades te chësc contest les strades chirides fora dala Junta. La pröma prevëiga na forma dopla de sostëgn indiret tres (1) inciaries por la defujiun dla comunicaziun istituzionala tres i mesi de stampa, respetan le prinzip de na spartiziun valia danter i media, y cun (2) les convenziuns cun les emitënzes radiofoniches y televisives por la produziun de sorvisc, trascmisciuns y porgrams d’interes general cun i dërc d’adoranza y de defujiun che ti speta ala Provinzia. Lapró röiel, sciöche secunda strada, le pilaster dl sostëgn diret ales aziëndes locales che laora tl setur mediatich che ará modalités desvalies en confrunt a denant. „Le sistem é gnü atualisé cun na lege plü tlera y scëmpla“, á splighé Kompatscher.
Preodü éle alisiraziuns tres contribuc zënza fic de retüda por na soma de un n miliun de euro por l’ann 2015, cun critérs y diretives che gnará stabilides tosc tres les normes d’atuaziun laurades fora en colaboraziun cun i grups d’interes locai. „Al é preodü da amplié la colaboraziun le plü poscibl por ti garantí n sostëgn a dötes les emitënzes privates y ai portai internet“, á recordé Kompatscher che á sotligné che tres le dessëgn de lege nü gnarál ince revaluté le Comitê provinzial por les comunicaziuns: al ará compic de control y consulënza nüs y al fajará pert dl prozes de assegnaziun di contribuc, insciö Kompatscher. La test de lege aprové dala Junta jará sëgn te Consëi olache al gnará ejaminé dala comisciun legislativa competënta.
rc
