Atualità
Internet asvelt: N'impreja nöia por renforzé le proiet dla banda leria
„Nosc obietif é n azes internet asvelt sön döt le raiun dla Provinzia por düc i abitanc dl Südtirol tres na rëi de banda leria efiziënta y publica“, á dit incö (18/06) l’assessuria Waltraud Deeg tratan la presentaziun dla rëi de banda leria dl Südtirol. La costruziun dl'infrastrotöra gnará acompagnada da na campagna de sensibilisaziun.
L’Europa á l’obietif da ti garantí al 50 porcënt dla popolaziun europeana cina l’ann 2020 coliamënc cun l’internet cun na velozité de minimo 30 Mbit/s, l’obietif dla Talia é chël da rové a coliamënc internet de 100 Mbit/s por l'85 porcënt dla popolaziun ti proscims cin’ agn (tres cina le 2020). "Nosta strategia por rové a chisc traverc – á recordé l’assessuria por l’informatica Waltraud Deeg incö (18/06) tratan na conferënza stampa - se basëia sön trëi pilastri: adoré le plü che ara vá les sinergies tl svilup dles infrastrotöres, anuzé de plü tecnologies dla banda leria y ti pité ai Comuns mosöres concretes de sostëgn.“ Propi i Comuns á le compit da realisé „l’ultima milia“, y propi por chësta rajiun á i Comuns tut pert a de plü incuntades cun i responsabls dla Provinzia ti ultims mëisc. L’assessuria por l'informatica á splighé inant che „i adorun na rëi dla banda lëria daverta a düc y publica, cun na cualité de rezeziun alta y che pois ti pité sides ai zitadins co ales aziëndes dër de bunes condiziuns.“ N svilup te chësc vers ne portass nia ma para vantaji por la competitivité dles aziëndes mo ince por i raiuns dalunc dai zëntri, insciö Deeg che prezisëia inant: „La rëi dla banda leria dl Südtirol dess ester de proprieté dla Provinzia y di Comuns, deache i investimënc te chësc proiet y tl'infrastrotöra vëgn en gran pert dala man publica.“
La gran novité dl plann operatif por rové ai obietifs é la creaziun de na sozieté ad hoc nöia, che porta atualmënter l'inom de "ST Fibernet", sciöche conseguënza dla fujiun danter SEL y AEW. Chësta sozieté nöia ne ará nia ma le compit da completé la realisaziun dla rëi telematica provinziala dla fira otica, mo ince da la manajé y da se crüzié dla manutenziun. „Cun chësta soluziun – á recordé l’assessuria Deeg – unse le vantaje de avëi n partner su de racoiüda dles competënzes y dl know how bele presëntes söl marcé, cun n smendrimënt ince di cosć.“
Por mirit dl’adoranza dles sinergies cun la rëi dl’energia y dles alisiraziuns fiscales preodüdes dal decret „Sblocca Italia“ é le potenzial de sparagn por la costruziun dla rëi (tolon ite ince „l’ultima milia“) de zirca 60 miliuns de euro (söi cosć preodüs de 300 miliuns). N ater vantaje é le smendrimënt dles spëises de manutenziun che jiss zoruch dl 50 porcënt cun n sparagn de 4 miliuns al’ann. „Implü podará i operadus privac avëi n azes cun condiziuns valies ala Rëi Südtirol, n fat che stimolëia ince la concorënza che podess porté a prisc plü a bun marcé por i consumadus.“ Te chisc dis ál ince metü man na campagna de sensibilisaziun che prevëiga banner, placac y ativités sön i social media tres i slogans #mettiamociinrete #wirvernetzen. Por plü informaziuns sön la strategia y sön la campagna prëibel ciaré do sot a www.provincia.bz.it/bandalarga.
rc
Galaria dales fotografies
Foto USP/ohn
