Atualità
Dala Junta: SOS Zebra, la campagna por plü sigurté sön strada vá inant
Sensibilisé i mituns y i jogn, mo ince i adulc y i maestri sön le tema dla sigurté sön strada y promöie la mobilité sostenibla: chisc é i obietifs prinzipai dla campagna SOS Zebra, che á metü man tl 2009 por sconé dantadöt i peduns sciöche componënta plü „debla“ sön strada. La Junta provinziala á tut incö (ai 23/06) la dezijiun da renové la campagna ince por le proscim ann de scora 2015/16.
I dac plü atuai che reverda le 2013 testimoniëia che te Südtirol él gnü registré dan da dui agn 187 inzidënc stradai cun peduns; i peduns feris é stá indöt 245 cun 7 porsones che á pordü la vita. Cuntra chësc bilanz tragich che reverda i inzidënc sön strada á la Junta proviniala aprové incö, mertesc ai 23 de jügn, mosöres de sensibilisaziun y educaziun nöies por smendrí le numer di inzidënc y por aumenté la sigurté sön strada. Por chësc motif y por promöie la mobilité sostenibla dles rodes y dl trasport publich él gnü arlungé la campagna de sensibilisaziun S.O.S. Zebra ince por le proscim ann scolastich 2015/16.
„Tratan l’ann scolastich apëna rové – sotlignëia l’assessur competënt por la mobilité Florian Mussner - sun stá bugn da arjunj cun les mosöres de educaziun y de formaziun dla campagna sura mile porsones danter scolars, maestri y geniturs – chësc ince por merit dla buna colaboraziun cun l’Ökoistitut, le Safety Park y la polizia comunala.“ Tres na seria de scomenciadies organisades tles scores á i mituns y les mitans podü imparé da se möi coretamënter sön strada, da reconësce abonora y da reagí tla manira plü iüsta ai pericui che pó se presenté sön strada, insciö Mussner. Le proscim ann gnarál ince indô lauré sön la promoziun dla mobilité sostenibla che á l'obietif da motivé i scolars y sü genitus y maestri da adoré de plü les rodes y le trasport publich sciöche mesi de trasport cuotidian. Adöm cun les mosöres de educaziun stradala tles scores cun sura 2.500 jorantis partis fora ai scolars y ales scolares laora l’Assessorat por la Mobilité ince diretamënter sön strada tres la costruziun de barieres de proteziun dlungia i marciapisc por aumenté la sigurté di peduns tratan so passaje sön strada.
rc
