Atualità
Mioré la cura di amará de crebesc cun la zertificaziun oncologica
La miú cura poscibla por paziënc che patësc le crebesc é le fin dla zertificaziun oncologica di ospedai dl Südtirol, n prozes che á scomencé da d’altonn dl ann 2013. L’assessuria Martha Stocker, i coordinadus Oswald Mayr y Luca Armanaschi á presenté incö (ai 3 de messé) adöm cun l’esperta Simone Wesselmann i contignüs y la situaziun atuala dl proiet.
Vigni ann él zirca 1.400 porsones che mör te Südtirol por gaujia dl crebesc. 20.000 südtirolej patësc adtualmënter do i dac de Oswald Mayr de n tumor. Por podëi curé i paziënc te na manira otimala dess les repartiziuns de cura ti ospedai dl Südtirol se armonisé aladô di standarg internazionai y cun les zertificaziuns nezesciares. „Cun la zertificaziun internazionala dla chirurgia oncologica aladô dl standard ISO 9001 á l’Aziënda sanitara dl Südtirol fat le pröm gran vare dl proiet scomencé dala Junta provinziala“, á recordé Ulrich Seitz, diretur dl Ofize por i ospedai incö tratan la conferënza stampa de presentaziun a Balsan.
Al'incuntada d'informaziun sön la situaziun atuala dl proiet ál tut pert danter l'ater aconsiadus provinziai, i suranstanc dl’Aziënda sanitara, rapresentanc dles organisaziuns soziales y di sindacac competënc, sciöche ince dles organisaziuns di paziënc y di doturs, dla sozieté südtiroleja de medejina generala (SÜGAM) y dl’academia südtiroleja de medejina generala (SAKAM). „Cun la zertificaziun oncologica sarál poscibl da aumenté la cualité dla cura y da formé zëntri de competënza spezialisá te döt Südtirol por efetué tl dagní i intervënc nezesciars ince söl post“, insciö l’assessuria por la sanité Martha Stocker. Implü dessel ince gní garantí diretamënter söl post ince la cura dan y do l’intervënt, insciö Stocker che recorda che tl zënter dl proiet él dantadöt la segurëza di paziënc y l'aumënt dla cualité dla cura.
I coordinadus dl proiet dl’Aziënda sanitara dl Südtirol Mayr y Armanaschi á presenté i proscims vari. „Do la zertificaziun oncologica aladô dl standard ISO 9001 é sëgn le proscim vare chël da stabilí critérs spezifics por la terapia de tumors ti seturs dla chirurgia generala, dla urologia, dla ginecologia y dla repartiziun dl col, nes y orëdles“, á prezisé Armanaschi che á recordé che al é important da informé dër avisa i paziënc bele dala diagnosa. L'esperta dla zertificaziun oncologica Simone Wesselmann y le presidënt dla Liga dl crebesc taliana Paolo Coser á recordé che le prozes de zertificaziun é important por garantí la cualité dla cura y che chësta documentaziun é n vare important por aumenté la poscibilité de varijun di paziënc.
Video conferënza stampa (por todësch)
http://we.tl/IoNyr7QXyi
Intervista Luca Armanaschi (por todësch)
http://we.tl/A67Ip4g5Yf
Intervista Simone Wesselmann (por todësch)
Intervista Paolo Coser (por talian)
http://we.tl/ZzbseFqZJ7
Intervistes Armanaschi, Weeselmann y Coser MP3 (audio):
http://we.tl/OtGszUgWxp
rc
