Atualità
San Cristofe – Mussner: „Por amplié la segurëza él nezesciar l'aiüt de düc“
En ocajiun dla zelebraziun anuala dl De de San Cristofe, protetur di viagiadus y di autisć, inviëia l’assessur por la mobilité Florian Mussner a plü prudënza sön strada y a n comportamënt responsabl y cosciënt canche an é sön le iade.
Canche i sun sön strada, recorda l’assessur por la mobilité Florain Mussner, él dagnora important da ester cosciënc dla gran responsabilité che an á devers nos instësc, nüsc familiars y les atres porsones sön strada. Por tigní fora inzidënc él gnü fat fora na seria de mosöres tecniches y iuridiches de prevenziun y de sconanza dales autorités competëntes. Chëstes reverda dantadöt le mioramënt dla segurëza sön strada y di auti, i controi costanc da pert dles forzes dl ordin, l’educaziun stradala y les straufunghes altes. Mo, sciöche al recorda l’assessur Florian Mussner, vál ince debojëgn che vigni autist y pedun se comportes te na manira responsabla y adatada ala situaziun dl trafich y dla strada. „Ince sce i inzidënc é gnüs demanco ti ultims agn é vigni inzidënt un de massa“, insciö Mussner.
Na velozité massa alta, n pice fal o na dejatenziun cörta pó gaujé de gragn dagns y tröp dolur y pó avëi conseguënzes fatales por döta la vita. L’assessur Florian Mussner se damana insciö da düc i autisć, en gaujiun dl De de San Cristofe, da smendrí la velozité y da la adaté ales condiziuns dla strada y dl tëmp, deache al é damí da arjunje le travert cun val’ menüt de intardiamënt, mo porchël sagns y sigüsc.
rc
