Atualità
Teritore y contrada: les diretives y i obietifs dla lege provinziala nöia
„Do les tröpes discusciuns y le laur intensif di ultims mëisc pon dí che i sun sön na buna strada“, á sotligné l’assessur Richard Theiner incö tratan la conferënza stampa olache al é gnü presenté les diretives y i obietifs dla lege provinziala nöia che reverda l’urbanistica y la sconanza dla contrada. La Junta provinziala á aprové inier (28/07) la proposta portada dant dal assesur por l’ambiënt.
Sön la strada che porta al’elaboraziun dla lege nöia sön l’urbanistica y l’ambiënt rapresentëia les diretives y i obietifs, aprová inier dala Junta provinziala, na sort de tofles d’orientamënt a na moda che chisc dui seturs pois gní regolá tl dagní te n su test de lege nü. Les diretives y i obietifs é gnüs elaborá en gran pert dala Repartiziun Natöra, contrada y svilup dl teritore tres n prozes partezipatif.
„Les diretives y i obietifs é gnüs a se le dé tres n prozes de partezipaziun de düc i interessá y tres chël che al é sté poscibl da ciafé n consens sön düc i punc plü importanc“, á splighé l’assessur Richard Theiner tratan la conferënza stampa da incö. La chestiun zentrala dla lege provinziala nöia é chëra da ciafé la dërta balanza danter l’adoranza dl frabiché y la sconanza dl ambiënt. „Le svilup dl’economia dess gní garantí te chës situaziuns, olache ara vëgn ghirada, tl medemo momënt él fondamental da sconé nosta contrada naturala y culturala“, sotlignëia Theiner.
La lege provinziala é gnüda elaborada do i prinzips dla scemplité y dla tlarëza, dla priorité dl interes publich, dla balanza, dla sostenibilité y dla capazité d’inovaziun. N prinzip fondamental é la spartiziun tlera di raiuns por abité y dles arees dla contrada naturala y culturala. „Ti confins dles arees por aciasamënc ará i Comuns de gran libertés por manajé y promöie l’anuzamënt y le svilup dl frabiché. Aldinfora dles speres preodüdes por abité á la sconanza y le svilup dla natöra y dla contrada la prezedënza “, insciö l’assessur por l’ambiënt.
Implü dessel gní sostigní la colaboraziun danter i Comuns por ci che reverda la promoziun de „raiuns funzionai“, che dess pité la poscibilité da elaboré planns y programs en colaboraziun danter plü comuns. N sëgn important te chësc vers é l’istituziun de na comisciun comunala nöia por le svilup dla teritore y dla contrada che se crüziará de chestiuns suracomunales. “La comisciun por le frabiché gnará istituida da trëi mëmbri dl Consëi comunal y da cinch esperc di seturs dl svilup dl teritore, dla natöra y contrada, di prighi naturai y dla cultura dl frabiché“, insciö Theiner. “La comisciun comunala por le frabiché dará jö n arat, les dezijiuns finales ti spetará ai ombolc söl livel comunal y ala Junta provinziala söl livel provinzial”, insciö l’assessur Theiner.
Anton Aschbacher, diretur dla Repartiziun Natöra, contrada y svilup dl teritore á porté dant te süa spligaziun d’atres diretives che vëgn aratades fondamentales. „Por tröp tëmp ê i raiuns d’espanjiun na poscibilité tl Südtirol por acontenté la ghiranza de raiuns por frabiché. Sëgn él da s’adaté a n orientamënt nü che passa da espanjiun a svilup plü monü ti raiuns bele istituis“, insciö Aschbacher. Tl dagní dess le pëis se sposté dal espanjiun al ressanamënt y a barac pro l’adoranza de componënc bele esistënc.
„Cun l’aprovaziun dles diretives y di obietifs da pert dla Junta provinziala él gnü stlüt jö la pröma fasa dl prozes che portará a na lege provinziala nöia sön le svilup dl teritore y dl ambiënt“, á splighé l’assessur Richard Theiner. Sëgn sarál da passé ala secunda fasa, che reverda la pert iuridica y la formulaziun de na proposta de lege nöia sön la basa dles diretives aproades. L’assessur Theiner á assiguré che al s’incuntará y che al chiriará le dialogh te chësta fasa cun i rapresentanc politics y les istituziuns y organisaziuns interessades. „Chësc ó dí che i jun inant sön le tru dla partezipaziun, por garantí che düc pois se reconësce daldô tla lege provinziala nöia.“ La contlujiun dl prozes d’elaboraziun dla lege nöia dess gní stlüt jö por la fin d’altonn 2016. Les diretives y i obietifs pó gní ciará do sön la plata internet Repartiziun Natöra, contrada y svilup dl teritore sot a: : www.provinz.bz.it/natur-raum/land-raum-mitdenken.asp
Retrac, intervistes, video:
Retrac conferënza stampa - http://we.tl/0mgNyGdY9u
Intervista assessur THEINER - http://we.tl/eZWaMu288G
Intervista diretur Repartiziun ASCHBACHER - http://we.tl/lLVB4mTtIG
Download file mp3
Intervista assessur THEINER - http://we.tl/fstrAT3nW3
Intervista diretur ASCHBACHER - http://we.tl/mjrWWRPOBe
rc
Galaria dales fotografies
