Atualità
Messé 2015: le mëis plü cialt dal mëteman dles mosoraziuns
Sce le mëis de messé, le plü cialt dal mëteman dles mosoraziuns, se röia cun n’aria frësca, gnará le cialt da d’isté indô a se fá sintí dai proscims dis cun temperatöres dër altes tl Südtirol che podará rové cina ai 35 degrá. Chësta la previjiun de Dieter Peterlin, le meterologh dl Sorvisc Meteo dla Provinzia.
A Balsan él gnü registré tl mëis de messé dl 2015, le mëis dl cialt record, indöt 23 nöts tropicales (cina sëgn ê le record de 22 nöts tl isté 2010). La nöt plü cialda é stata chëra di 16 de messé cun la temperatöra plü basa de 25,7 degrá.
Un di püc recorg che le mëis de messé ne á nia arjunt é chël dl valur plü alt, che resta chël di 11 de agost dl 2013 cun 40,1 degrá. Le de cun la temperatöra plü alta dl mëis de messé é sté ai 21 de messé a Balsan cun "ma" 38,3 degrá.
Te döta la Provinzia él gnü registré en gran pert temperatöres dër altes sura le valur mesan dla sajun da 3,5 a cina 4 degrá plü altes. A Balsan él ince gnü registré le valur mesan plü alt de tres cun 27 degrá, le record de denant s’â archité a 26 degrá tl mëis d’agost dl 2003. Vigni de él gnü superé i 30 degrá, y por 15 dis bëgn i 35 degrá.
La temperatöra plü basa dl mëis de messé dl 2015 é gnüda registrada ai 10 de messé a Welsberg tla Val de Puster cun 4,1 degrá, ti raiuns dles munts altes a la staziun meteo dla „Cima Beltovo“ a 3.300 metri registré le valur plü bas cun manco 4,8 degrá. Iregolar é sté le bilanz dles prezipitaziuns dl mëis de messé cun n record de passa 27 mile tarlis registrá.
rc
