Atualità
Kompatscher y Giacomelli, martl dles Dolomites y convenziun RAI
N martl nazional da 95 centejims che zelebrëia les Dolomites: chësc é sté le tema zentral dla conferënza stampa da incö danmisde (ai 4 d’agost) a Balsan cun le presidënt Arno Kompatscher y le secreter de Stat Antonello Giacomelli. Döes dles chestiuns tratades é ince stades la convenziun Rai y la colaboraziun tl dagní danter la RAS y le program de svilup dl internet asvelt.
Na fotografia de Gottfried Tappeiner dl Grup dles Odles, tl cör dles Dolomites, conzepida dal’artista Anna Maria Maresca é le retrat dl martl nü da 95 centejims dé fora dala Posta taliana y dal Minister por le svilup economich. „Al se trata de n reconoscimënt nia ma ala belëza – insciö le Secreter de Stat Giacomelli – mo ince ala capazité dla popolaziun y di governs locai da armonisé la convivënza danter la natöra y les porsones, danter le svilup y la sconanza dl teritore. N messaje important y positif en confrunt a n valgügn ejëmpli negatifs che é da ciafé tl rest dla Talia.“
„I sun capazi che öna de nostes perles – á ajunté le presidënt südtirolej Kompatscher – ais l’onur da gní stampada sön n martl. Al se trata de n percurs stlüt jö, sön d’atri sunse ciamó tla fasa de scomenciamënt.“ Le referimënt dl presidënt Kompatscher reverda la reforma dla Rai y la convenziun danter Stat y Provinzia, sön la basa dl’acordanza de Milan, che granatësc por le 2016 le finanziamënt de 20 miliuns de euro por la sënta da Balsan y che reverda la programaziun por ladin y todësch. „Chësta acordanza é n gran suzes cun l’arjunta de n obietif de plü agn, olache i sun damaná da anuzé chëstes gran potenzialités“, insciö Kompatscher.
„La lege de governance dla Rai á tut en conscidraziun chël che i un fat fora pro l’acordanza de Milan y rapresentëia n vare important sön la strada dl raport cun les autonomies te n’otica de revijiun dl sorvisc publich che dess tres deplü ester dlungia les ghiranzes dles comunités locales.“ Le presidënt Kompatscher á ajunté che „al vëgn lauré dötaurela sön le svilup dla convenziun Stat-Provinzia che pois monitoré y mioré le percurs metü man.“ Öna dles chestiuns tl dagní sará ince le renforzamënt dla colaboraziun danter la RAS y le RayWay tla gestiun di rezeturs.
L’ultima chestiun tratada tratan la conferënza stampa dl secreter de Stat Giacomelli y le presidënt Kompatscher é stada l’internet asvelt. „Da pert dl govern pói garantí la desponibilité plëna da sostigní proiec che renforzëia le teritore“; á comenté Giacomelli. Kompatscher á recordé che „la strategia dla junta provinziala é en linia cun chëra dl govern nazional por ci che reverda i contignüs y les mosöres. I sun arjigná ca por anuzé les poscibilités che le govern metará a desposiziun por svilupé inant les autostrades dl 21ejimo secul, na gran chance ince por le Südtirol por mantigní i standarg de competitivité y bëgnester.“
Por plü informaziuns:
Videointervista Giacomelli martl
Videointervista Giacomelli RAI
Audiointervista Giacomelli martl
Audiointervista Giacomelli RAI
rc
Galaria dales fotografies
Foto USP/ohn
