Atualità
Dala Junta: mesi dl Sorvisc strades plü efiziënc y che incuinëia demanco
La Provinzia de Balsan á aprové incö (ai 11/08) n investimënt de 3,7 miliuns de euro por renové i mesi a desposiziun dl Sorvisc strades dla Provinzia. La deliberaziun é gnüda proponüda dal assessur por la mobilité Florian Mussner che stlarësc ince i vantaji de chësta operaziun: mesi plü efiziënc, smendrimënt di cosć de manutenziun y dl incuinamënt.
„Sön na pröma odlada podessen avëi la sensaziun che i 3,7 miliuns de euro metüs a desposiziun dala Provinzia sides n'investimënt massa alt, mo en realté él na soma che portará para plü vantaji ti proscimi agn cun conseguënzes positives ince sön l’ambiënt“, á sotligné l’assessur Florian Mussner. Le renovamënt di mesi dl Sorvisc strades é n prozes che vá inant sön plü liví y, por merit dla cumpra de mesi de trasport cun atrezadöres plü modernes, sarál poscibl da smendrí le numer complessif di mesi atuai en sorvisc.
„I un calcolé che por mantigní i standarg dla cualité atuai él nezesciar da cumpré 48 mesi nüs y plü moderns che podará remplazé indöt 58 mesi che vëgn conscidrá nia plü efetifs. Sce i metun lapró la rotamaziun de atri 7 veicui, gnará le numer complessif di mesi dl trasport smendrí de bëgn 17 unités, cun vantaji dantadöt por les spëises de dorada lungia“, insciö l’assessur Mussner.
Le numer complessif di mesi a desposiziun dl Sorvisc strades dla Provinzia de Balsan, n iade stlüta jö chësta operaziun, sará de 702 unités (denant 860) y bele atualmënter é le numer söporjö anfat (en relaziun a strades y popolaziun) a chël di vijins dl Trentin y dl Tirol. L’assessur por la mobilité á sotligné inant l’importanza dla reduziun di veicui che á plü de diesc agn. „I cosć dla manutenziun podará gní smendris drasticamënter, tolon ince en conscidraziun les conseguënzes positives dl passaje di veicui dles categories danter euro 0 y euro 3, por passé ai veicui nüs dla categoria plü ecosostenbila euro 6“, á stlüt jö l’assessur.
rc
