Atualità
Abo+, le mez di anuzadus á bele scrit fora les domandes online
La Provinzia ti respogn ales critiches fates ti ultimi dis che reverda les prozedöres por damané do l’Abo + por scolars. „L’internet y le barat di dac online é oramai na realté“, sotlignëia l’assessur por la mobilité Florian Mussner, che spliga che „bele le mez di anuzadus á scrit fora les domandes online.“
Plü asvelt, demanco cosć, smendrimënt de papier: chisc é i punc zentrai de forza de n’aministraziun publica „digitala“ che s’adatëia ai tëmps y aladô de chësta logica él ince gnü metü en pe le sistem de renovamënt dles zirca 70mile chertes dl Abo+ tl Südtirol por scolars. Al se trata de chertes d’abonamënt cun chëres che i scolars y les scolares pó anuzé i mesi dl trasport publich integré cun 20 euro al ann. „Cina l’ann passé jôl debojëgn da scrí fora na domanda sön papier che messâ spo gní inserida tl sistem informatich, chësta operaziun vëgn sëgn fata diretamënter online dal anuzadú“, spliga le diretur dla Repartiziun Mobilité Günther Burger.
Tles ultimes edemes él bele sté passa 36mile anuzadus, che fej fora zirca fora le mez dl numer complessif, che á scrit fora la domanda online. Canche an se scrí ite vál ince debojëgn da paié dla cuota anuala y ortié inant na copia dla cherta d’identité. „Le percurs aministratif prevëiga le paiamënt de na tarifa por l’Abo+ y ne pó porchël nia gní fat dales scores“, dij Burger, che recorda che al é ince poscibl da paié la cuota anuala diretamënter pro les portines dl trasport publich integré. „Sce l’anuzadú s’informëia te na manira adatada sön la documentaziun nezesciara spo pó la prozedöra online gní stlüta jö te püc menüc“, ajuntëia le diretur Günther Burger.
Sön le portal http://www.mobilitaaltoadige.info/lad bastel jí sot a „domanda online“, olache an ciafa spo dötes les informaziuns nezesciares sön l’iscriziun. Por les domandes online vál debojëgn: di dac personai y dl codesc fiscal dl scolar/dla scolara y dl genitur che fej domanda, le numer dla cherta dl Abo+ che vëgn dötaurela anuzada. Ti 15 dis suandënc mëssel spo gní mené por email, o ciarian sön le cunt digital online, na copia digitala dla cherta d’identité. Por ci che reverda le paiamënt di 20 euro al ann él poscibl da paié la soma tres na cherta de credit (diretamënter tratan che an fej domanda online o daldô tres le cunt digital online), tres le sistem dl homebanking pro les banches autorisades dla Banca Popolara, Cassa de Sparagn y la Cassa Raiffeisen, paian diretamënter cun contanc pro les portines dl trasport publich integré portan para l’Abo+ o tres le cunt personal te banca cun le sistem SEPA Direct Debit.
rc
