Atualità
Migranc, le Payern ti damana n aiüt provisore al Südtirol
Tres le Südtirol s’ativëia la Talia por sostigní la Germania pro l’acoliënza provisoria de migranc: le Payern á damané n aiüt logistich ala Provinzia de Balsan te chësta perioda d’emergënza y le presidënt Kompatscher á ciafé löm vërda dal Govern talian por ospité por n valgügn dis na pert di migranc che é söl iade por i Paisc Todësc.
Tl Payern vëgnel registré tles ultimes ores n numer record de migranc che röia adalerch, dantadöt tres le percurs di Balcans y che porta para n gröm de sfidades logistiches nöies y na situaziun dër ria da manajé: atualmënter vëgnel inrescí da pert dla regiun todëscia por ciafé strotöres d’acoliënza nöies y por archité tles proscimes ores le numer dër alt de profugs che röia adalerch. Porvia de chësta situaziun d’emergënza á la ministra dl Payern Emilia Müller contaté l’assessuria provinziala Martha Stocker, por rajiuns de coordinamënt ince cun i rapresentanc de düc i raiuns vijins, por ti damané n sostëgn logistich provisore pro l’acoliënza di migranc. Le presidënt Kompatscher á informé le Govern talian por damané l’aprovaziun nezesciara de n intervënt d’aiüt a bëgn dl Payern, „tl contest de n’autonomia responsabla y solidara, mo ince de sostëgn europeich por se möi sura i confins regionai y statai fora.“
Le Govern se á atira detlaré desponibl a sostigní la ghiranza dla Germania cun n aumënt di controi ai confins dl Prener, tignin cunt dles acordanzes de Schengen, sciöche ince bele sozedü en ocajiun dl’incuntada G7. La Provinzia de Balsan se fistidiará insciö por n valgügn dis – sciöche mosöra provisoria por ti pormët al Payern da se reorganisé y da manajé l’emergënza – dl’acoliënza de 300 cina 400 migranc. Al gnará metü a desposiziun n valgönes palestres adatades por la sojornanza de porsones. Dla gestiun y dl’assistënza se fistidiará la Proteziun zivila en colaboraziun cun les assoziaziuns locales de volontariat. Les spëises por chësc intervënt d’umanité vëgn surantutes dal Stat.
rc
