Atualità
CCI, la Consulta se damana plü sconanza por les families cun tröc mituns
Les novités che reverda la Cuta comunala sön i imobiliars CCI (IMI) y la lege sön i apalc nöia: chëstes é stades les tematiches tratades dal’assessuria Waltraud Deeg y dal assessur Arnold Schuler tratan n’incuntada dan da püch dla Consulta por les families, che se damana plü sconanza por les families cun tröc mituns.
„La Consulta – insciö dij l’assessuria Deeg - á dé n arat positif sön la proposta da amplié ciamó deplü l’area d’eseziun dla CCI, y da tó demez insciö l’oblianza da paié chësta cuta por la gran pert dles abitaziuns detlarades sciöche pröma ciasa.“ N aumënt dla sconanza dles families cun tröc mituns se damana indere la Consulta por ci che reverda le punt che prevëiga la conzesciun de n’esenziun de 50 euro dal terzo möt sot ai 18 agn inant. „La proposta vá tla dërta direziun – spliga l’assessuria – mo l’esenziun ne dess nia ma gní aplicada cina che i mituns complësc i 18 agn, mo cina che ai é aciaria di geniturs. Chësta mudaziun foss n aiüt por les families cun plü mituns, deache ares á la nezescité de abitaziuns plü granes.“
Adöm cun l’assessuria Deeg á ince tut pert al’incuntada l’assessur por i ënc locai Arnold Schuler, che á presenté les novités prinzipales che reverda la CCI, y le diretur dl’Agenzia por i apalc Thomas Mathà che á ilustré la proposta de lege nöia cun sü trëi pilastri prinzipai: scemplificaziun, plü segurëza iuridica y n’atenziun particolara ala cualité che ti vá a bëgn dles produziuns locales y dles condiziuns soziales y ambientales. „La lege sön i apalc ará ince conseguënzes por i sorvisc d’assistënza di pici mituns cina ai 3 agn cun diretives nöies che dess porté a’n aumënt dla cualité“, stlüj jö l’assessuria Deeg.
rc
Galaria dales fotografies
Foto USP/kl
