Atualità
Portada a piz la sistemaziun dla strada provinziala Longega-Rina
Sëgn él ince gnü stlüt jö i laurs dl terzo lot che reverda la sistemaziun dla strada provinziala che porta da Longega a Rina. Sön inciaria dla Repartiziun Infrastrotöres él gnü ressané y amplié na trata de indöt 2,7 chilometri. Le cost dles operaziuns de sistemaziun é sté de indöt 6 miliuns de euro.
Dantadöt por corieres y camions presentâ n valgönes pertes dër strëntes dla strada danter Longega y Rina de plü problems de lerch cun otes ince pericoloses. Implü messâ la strada gní ressanada te n valgönes perts cun intervënc de prescia. La strada nöia é gnüda fata sö en gran pert aladô dl percurs original che porta da Longega a Rina. Sön n valgönes perts, dantadöt tles otes plü strëntes, é la strada gnü ampliada cun vantaji dantadöt por la visibilité y la viabilité. La strada te trames döes les direziuns é leria por pert 2,5 metri.
„La realisaziun de strades nöies cun n azes plü alisiré ales localités dles singules valades é importanta ince por garantí la cualité de vita di zitadins che vir te raiuns dalunc dai zëntri urbans“, insciö l’assessur por le frabiché Christian Tommasini. Cun la stlüta di laurs dl terzo lot se röia insciö la sistemaziun dla strada provinziala che porta da Longega a Rina y che é gnüda metüda man dan da 12 agn. Le pröm y le secundo lot, che é bele gnüs completá denant, á na lunghëza de indöt 1,5 chilomteri.
Tl mëis de setëmber gnarál ciamó fat laurs da asfalté y de completamënt dla strada. I laurs por la sistemaziun dl terzo lot é gnüs fac dal’impresa OBEROSLER Cav.Pietro s.r.l. cun n investimënt de 6 miliuns de euro. La realisaziun dl proiet é gnüda manajada dal injenier Gustav Mischí, diretur dla Repartiziun Infrastrotöres dla Provinzia.
rc
