Atualità
Kompatscher incunta Wallner: Macroregiun alpina y colaboraziun europeica
Pröma incuntada ofiziala incö (10/09) a Balsan danter le presidënt dla Provinzia Arno Kompatscher y chël dl Land austriach dl Vorarlberg Markus Wallner. I dui suranstanc á sotligné l’importanza da „lauré adöm por se fá sintí deplü tl contest europeich.“ Danter les tematiches tratades él ince sté la Macroregiun alpina, l’economia y la formaziun.
Le pröm argomënt traté tratan l’incuntada é sté le renforzamënt de na strategia unitara tl contest dl’Uniun europeica, s’anuzan ince dles plataformes bele esistëntes sciöche l’Arge Alp. „Al é fondamental che i laorún adöm por ciafé soluziuns deboriada ales medemes sfidades – insciö le presidënt Kompatscher - y la colaboraziun é fondamentala por sconé le plü che ara vá nüsc raiuns da munt a Bruxelles. Sot a chësc punt d’odüda pënsi che la nasciüda dla macroregiun alpina nes dará dër de bunes prospetives por le dagní.“ Le proiet dla fondaziun dla macroregiun alpina é te na fasa dër dlungia ala contlujiun, cun n grup de laur che analisëia ciamó n valgönes chestiuns por podëi tosc damané (plüssigü tl mëis de dezëmber) l’aprovaziun dal’Uniun Europeica.
Markus Wallner, che é presidënt dl Land Vorarlberg dal 2011, á ajunté che „cun la macroregiun alpina gnarál a se le dé de plü poscibilités de colaboraziun positives te plü seturs importanc por les Alpes: dal ambiënt ala mobilité, dal turism al’energia, dal’economia cina ala formaziun.“ Propi la formaziun é n setur olache les somianzes dles döes provinzies é dër granes. „Le sistem dual dla formaziun profescionala vëgn apliché da entrames les provinzies y al ne é nia ma por caje che le Südtirol y le Vorarlberg á öna dles porcentuales de dejocupaziun jonila plü basa a livel europeich“, á stlüt jö i dui presidënc Kompatscher y Wallner.
Dessot i link por desciarié les intervistes video y audio dl'incuntada
Video intervista Wallner (todësch)
Audio intervistes Kompatscher y Wallner
rc
Galaria dales fotografies
Foto USP/mb
