Atualità
Dala Junta: Mudaziuns dl regolamënt sön i contribuc por l’afit
Dal 2013 é i contribuc provinziai por l’afit strotorá atramënter: les döes prestaziuns da denant, le sostëgn por la ciasa paié dal IPES y le contribut por l’afit paié dai raiuns soziai, vëgn metüs adöm te na sora prestaziun. Tla fasa transitora dl regolamënt nü vál debojëgn de n valgügn adatamënc aprová incö (22/09) dala Junta provinziala.
Do n valgügn adatamënc al regolamënt sön l’afit metüs sö dl 2014 sön i contribuc ales families monoparentales y l’aumënt dl contribut por les spëises implü a bëgn dles porsones en ponsiun che ciafa la ponsiun minimala, á la Junta provinziala aprové tla sentada da incö d’atres mudaziuns dl sistem nü. Di adatamënc nüs á naota l’assessuria Martha Stocker baié cun cun les perts soziales.
Ince sce les döes mosöres che valô denant se basâ sön sistems desvalis de valutaziun dla situaziun economica, s’á la regolamentaziun nöia desmostré iüsta y porta pro a na conzesciun plü mirada y avisa dl contribut. Ajache al é gnü metü adöm les döes prestaziuns vára ince da mantigní na soma costanta dl contribut da paié fora.
Te caji desvalis che reverda i benefiziars dl contribut che á n davagn plü alt, mo dagnora ti limic dl davagn preodü dal contribut por l’afit, él gnü sö che che tl tëmp transitore de trëi agn ái ciafé na soma mëndra co le sostëgn da denant. Ara se trata de porsones che ciafa sëgn n contribut al mëis danter 25 y 150 euro.
Por compensé en pert chësta desfarënzia respet al contribut che an ciafâ denant, ti gnarál dé ales porsones interessades n aumënt dl contribut por l’afit y i cosć implü. Les ressurses finanziaries implü metüdes a desposiziun dala Provinzia por chësc majer sostëgn é de incër 2,5 miliuns de euro al ann.
Aladô dla deliberaziun aprovada incö dala Junta provinziala, ne ciafa che che n’azetëia nia le cuartier dl IPES nia le contribut por l’afit por cin agn. Chësta dezijiun vá a öan cun ci che é bele gnü fat fora tl passé dala Junta sön l’esclujiun da d’atres assegnaziuns dla porsona che n’azetëia nia le cuartier dl IPES.
La fasa trienala dl passaje dles competënzes dl sostëgn por la ciasa dl IPES ai raiuns soziai se stlüj jö dl 2016. Tl dagní sarál na sora prestaziun manajada dai raiuns sciöche contribut por l’afit.
USP
