Atualità
Formaziun y laur: sotescrita n’acordanza danter Südtirol y Paiern
La Repartiziun Laur dla Provinzia y la Direziun regionala dl Paiern dl’Agenzia por le laur s’á incunté incö (28/09) a Balsan por n convëgn sön le marcé dl laur, tratan chël che al é gnü firmé n’acordanza sön na colaboraziun plü strënta por ci che reverda le barat de personal spezialisé.
Le Bundesland todësch dl Paiern y la Provinzia de Südtirol á sistems dla formaziun y dl laur cun na cuantité costanta de posć de laur y de educaziun por lerneri y personal spezialisé ti seturs plü desvalies dl’economia. Por ciafé na soluziun ala mancianza de personal spezialisé y por renforzé la colaboraziun di marcia dl laur di dui raiuns á l’assessuria por le laur Martha Stocker y la ministra dl laur dl Paiern Emilia Müller firmé incö (28/09) n’acordanza de colaboraziun.
Tres chësta acordanza dessel insciö gní amplié le barat de lerneri, de scolars y de praticanc. I jogn ne podará insciö nia ma imparé a conësce prozedöres de laur y de stüde nöies, mo ai podará ince se dé jö cun le stüde di lingac foresć y magari scomencé n percurs de laur tl Paiern o te Südtirol. Le focus dla colaboraziun reverda dantadöt i seturs dla hoteleria y dla lauraziun dl lignan.
„L’incuntada é ince stada n’ocajiun por esperc y responsabls dles döes agenzies de laur por s’incunté y s’informé sön les situaziuns desvalies di marcia dl laur. Degun marcé dl laur ne pó plü s’archité sön i confins di stac y dles provinzies, sciöche an vëiga ince atualmënter analisan les situaziuns tla Germania y tl Paiern“, á sotligné le presidënt dla Provinzia Arno Kompatscher tratan le convëgn.
„Le Paiern y le Südtirol á n lian dër sterch, ince tl contest dl Arge Alp. Cun la cooperaziun sotescrita incö sarál poscibl da amplié i bun raporc y da aumenté la colaboraziun transfrontaliera. L’acordanza de cooperaziun nes dá la poscibilité da baraté fora les forzes de laur plü spezialisades y da respogne ai cambiamënc tl monn dl laur te na manira adatada“, á sotligné le ministra dl laur dl Payern Emilia Müller incö a Balsan.
„Cun la rëi transfrontaliera EURES Transtirolia él bele gnü cherié na plataforma de barat dl personal spezialisé danter le Bundesland Tirol, i Grijiuns y le Südtirol“, á splighé inant l’assessuria por le laur Martha Stocker. „Ince cun le Paiern - insciö Stocker - él gnü stabilí raporc de laur strënc che pó sëgn gní renforzá, ince deache la mentalité y le lingaz di dui raiuns se somiëia dër. Danatdöt por i zitadins che á le talian sciöche lingaz dla uma é chësta na buna poscibilité por imparé todësch y ince por i lauranc dl Paiern pól ester n vantaje da colaboré cun porsones che conësc le talian.“
„L’acordanza sotescrita incö cun le Paiern é ponsada dantadöt por i jogn che fej atualmënter n stüde o n lernerat“, á sotligné le diretur dla Repartiziun Laur Helmuth Sinn. „Deache i sistems dl’educaziun y dla formaziun se somiëia é chësta acordanza na buna ocajiun da fá esperiënzes de laur tl Paiern y/o tl Südtirol“, insciö Sinn. Ince Markus Schmitz, le presidënt dla Direziun regionala dl Paiern dl'Agenzia por le laur é dër contënt de chësta acordanza, ince deache ara dëida da sostigní la mobilité dl personal spezialisé ti raiuns de confin, insciö Schmitz.
Imajes y Intervistes
Imajes dl convëgn de colaboraziun danter le Paiern y le Südtirol http://we.tl/nX0jspORMw
Imajes dla firma dl'acordanza danter le Paiern y le Südtirol http://we.tl/1nOZY589iB
Intervista Arno Kompatscher (talian)
Intervista Martha Stocker (talian)
Intervista Helmuth Sinn (talian)
Intervista Emilia Müller (todësch)
DOWNLOAD MP3: ma audio
(Kompatscher + Stocker + Sinn + Müller)
http://we.tl/BIIDr5ga1I
rc
Galaria dales fotografies
(d.m.c.): le diretur dla Repartiziun Laur Helmuth Sinn, l'assessuria por le laur dl Paiern Emilia Müller, l'assessuria Martha Stocker y le presidënt dla direziun regionala dl Paiern dl'Agenzia por le laur Markus Schmitz. (Retrat: USP - Maria Pichler)
