Atualità
La Gran vera söl web Euregio: i trentins tema d’otober
www.14-18.europaregion.info é le link dl portal web dl'Euregio Tirol-Südtirol-Trentin sön le centená dla pröma vera mondiala. Tla seziun "Let's talk" vëgnel aprofondí vigni mëis temesc nüs cun domandes y respostes. D’otober vëgnel baié di trentins te vera.
Tla seziun "Let's talk" de www.14-18.europaregion.info, le portal dl Südtirol, dl Tirol y dl Trentin, inviëia l'Euregio vigni mëis da ponsé sura n tema lié a na scomenciadia o a n avenimënt dla Gran vera tres trëi domandes y respostes di storics locai. Por chësc mëis propon l'Euregio n aprofondimënt sön le destin di trentins tl conflit.
La mobilitaziun tolô ite i ëi abli dai 18 ai 50 agn; dal Trentin nen él pié ia 60 mila cun la uniforma dl imper y n cuinto é mort tl conflit. La destinaziun di soldas trentins é sté dantadöt le frunt oriental, n iade lunch cun la ferata tl teritore dla Galizia, danter Polonia y Ucraina, tla pert plü setentrionala dl imper austroungarich.
La plata dl mëis dl'Euregio recorda ince che d’agost dl 1914 se trasforma la Galizia te n gran ciamp de vera, olache al combat i soldas austroungarics y rusc. Tratan le pröm mëis él sté dër de gran batalies; i soldas trentins á combatü dassënn y i rusc é rová tla Galizia orientala y zentrala d'otober dl 1914.
Pro les “Galleries de Piedicastello” de Trënt é la “Galleria Bianca” dedicada al pröm conflit mondial cun les mostres "I trentini nella guerra europea 1914-1920" y "Città fortezza - Trento 1915-1918". Daurida dal mertesc ala domënia, orar 9-18, entrada debann. Plü informaziuns pon ciafé tlican sön: www.14-18.europaregion.info
OSP
