Atualità
De dles mitans: sensibilisé cuntra la violënza y la descriminaziun
En ocajiun dl De mondial dles mitans y dles ëres jones ai 11 de otober sotlignëia l’assessuria por l’avalianza dles oportunités Martha Stocker y la presidënta dla Comisciun por l’avalianza dles oportunités Ulrike Oberhammer l’importanza dles aziuns de sensibilisaziun y dles mosöres de prevenziun cuntra la violënza y les descriminaziuns ti confrunc dles mitans y ëres jones.
Le De mondial dles mitans y dles ëres jones 2015 vëgn tigní sot al moto „La forza dles mitans crësc – vijiuns por le 2030“ (La forza delle ragazze in crescita – visioni per il 2030) por sotigní les mitans y ëres jones tres l’educaziun y por arjunje n’avalianza de oportunités te vigni setur. Implü é le De mondial ince n segnal por atué mosöres legislatives che combat les descriminaziuns y che prevëiga degöna toleranza cuntra la violënza sön les ëres por „rajiuns culturales y/o tradiziuns“.
L’assessuria provinziala por l’avalianza dles oportunités Martha Stocker recorda che al é important da mioré les condiziuns de vita dles ëres desvantajades por arjunje n’avalianza de oportunités. Tl Südtirol él la Comisciun provinziala por l’avalianza dles oportunités, istituida dan da 25 agn, che s’ativëia por le bëgn dles ëres y por sü dërc. L’aniversar di 25 agn é ince na buna ocajiun da ciaré zoruch y da analisé les sfidades dl dagní. Danter i temesc da traté él la desfarënzia de paiamënt danter ël y ëra, le renforzamënt dla presënza feminina te politica y tl’economia, la medejina de jene y strategies por aumenté le numer de mitans che se dá jö cun les materies MINT (matematica, informatica, sciënzes naturales y tecnica) por adoré sües capazités ince te chisc seturs.
L’importanza dl De mondial dles mitans y dles jones vëgn ince sotrissé dala presidënta dla Comisciun provinziala por l’avalianza dles oportunités Ulrike Oberhammer, ince deache de plü mitans y ëres vëgn tres ciamó discriminades ti seturs desvalies y che é vitimes de violënza ince te Südtirol. La Comisciun provinziala por l’avalianza dles oportunités y le Sorvisc Ëres se fistidëia insciö de plü proiec de prevenziun cuntra la violënza sön les mitans y ëres, sciöche por ejëmpl cun n’app y n codejel aposta dediché ala tematica cun consëis d’ütl por aumenté la segurëza dles mitans. N ater compit dla Comisciun é chël da sostigní les mitans te sües dezijiuns formatives y profescionales ince tres porsones de referimënt. Öna de chëstes pó ester por ejëmpl l’astronauta trentina Samantha Cristoforetti.
rc
