Atualità
I trëi punc nüs sön la strada danter Rina y Antermëia é sëgn injigná
Chisc dis él gnü porté a termo i laurs de demoliziun y recostruziun di trëi punc sön la strada provinziala SP174 che coliëia i paisc de Rina y Antermëia. Sëgn vëgnel garantí che al pó passé cun segurëza ince camions. Insciö éson indô rová n vare inant cun le program di intervënc che reverda la sistemaziun dles strades tla valada.
I punc che é gnüs interessá dai intervënc é chi che é al chilometer 1,570, al chilometer 3,750 y al chilometer 5,000 dla strada provinziala. I intervënc de demoliziun y recostruziun é gnüs metüs man ai pröms de messé de chëst ann y é gnüs a costé indöt presciapüch 249mile euro.
Sciöche l'assessur provinzial por i laurs publics Christian Tommasini alza fora, éson cun i laurs realisá indô rová n vare inant cun le program di intervënc metü jö dala Repartiziun Infrastrotöres sot ala direziun dl injinier Gustavo Mischi, por mioré la situaziun dl trafich y dantadöt la segurëza sön les strades dla Val Badia. Pormó les edemes che é stades él gnü stlüt jö laurs por la sistemaziun dles strades provinziales a Rina, San Martin y Pidrô che á costé indöt 8,5 miliuns de euro.
I laurs sön i punc dla strada provinziala Rina-Antermëia é gnüs fac por la Provinzia dala dita TAU BAU cun sënta a Natz-Schabs (BZ) sön la basa dl proiet dl'injiniera Simona Sedlak dla Repartiziun Infrastrotöres dla Provinzia che á ince surantut la direziun di laurs. Responsabl unich dl prozedimënt é le geometer Karl Bernard dl Ofize tecnich Strades nord-ost.
Le proiet de ressanamënt odô danfora la demoliziun dles strotöres cun le mantignimënt dles sciables che ê y cun le renovamënt dla strotöra orizontala metüda adöm da lastres de petun armé. A chësta moda vëgnel sëgn garantí che ince i mesi de trasport plü pesoc pois passé te na manira sigüda. Denant che i laurs gniss fac êl propi limitaziuns de ciaria por i trëi punc dla strada provinziala da otes strëntes y en pert bindebó ërta che vá da Longega sö Rina y spo inant a Antermëia.
Porvia dles condiziuns ambientales particolares é i laurs gnüs realisá te trëi tëmps: al é gnü metü man cun le ressanamënt dl punt al chilometer 5,000, spo éson passá a chël dl chilometer 3,750 cina a rové pro l'ultimo al chilometer 1,570.OSP
