Atualità
Sconanza dl lëgn y lignan: L’assessur Schuler firma la „Charta dl Lëgn"
L’assessur Arnold Schuler á firmé incö (ai 9 de novëmber) a Balsan cun i rapresentanc di seturs dl’agricoltöra, dl comerz y dl setur energetich la „Charta dl lëgn“. Al se trata de n documënt che prevëiga „la realisaziun de mosöres de promoziun por chësta ressursa preziosa che á ince na gran valüta economica por nüsc raiuns“, insciö Schuler.
Le 50 porcënt dl paesaje dl Südtirol é curí da bosć, y le 60 porcënt dl bosch te Südtirol á de plü funziuns de proteziun che é fondamentales por la sconanza dl clima y che á ince n gran valur sciöche area de recreaziun vijina. Implü garantësc la lauraziun dl lëgn tröc posć de laur tl Südtirol cun indöt 650mile metri cubics de lignan che röia tles aziëndes locales por gní arjignades ca."Düc i rapresentanc de chësc setur che á da nen fá cun la sconanza y lauraziun dl lëgn s’incuntará sëgn tresfora por lauré adöm y svilupé inant idees y aziuns nöies por sostigní la promoziun de chësta ressursa preziosa te na manira sostenibla", á sotligné incö (ai 9 de novëmber) l’assessur Arnold Schuler tratan la presentaziun dla "Charta dl lëgn" a Balsan. Le lëgn dess se svilupé tres de plü tl vers de n produt de cualité y por arjunje chësc fin él nezesciar da avëi ince na formaziun spezifica te chësc setur tles scores profescionales. L’assessur Schuler á rengrazié dötes les assoziaziuns economiches che á tut pert ala mësa torona de discusciun che é gnüda coordinada dal TIS innovation park.
Tratan l’incuntada da incö él ince gnü sotescrit la „Charta dl Lëgn“ da pert dl assessur Schuler, dl presidënt dl TIS Nikolaus Tribus, dl presidënt dl Bauernbund Leo Tiefenthaler, da Paolo Bortolotti dla seziun lëgn tl’Assoziaziun di imprenditurs, da Kurt Egger dl grup de mestiers lëgn tl’Assoziaziun di artejans, da Rudi Rienzner dl’Uniun energia Südtirol y da Hansjörg Prast de IDM Südtirol.
I dac tecnics dla scomenciadia nöia por promöie le lëgn pon ciafé sön la plata internet dl TIS innovation park sot ala misciun: http://tis.bz.it/it/cluster/legno-tecnica/news/201ccharta-del-legno201d-sottoscritta-solennemente?set_language=it
Imajes - http://we.tl/qWSOiHQIZU
rc
Galaria dales fotografies
