Atualità
Fondaziun Dolomites UNESCO, cina la fin dl ann strategia por le turism
La mobilité y l’elaboraziun de n plann strategich por n turism sostenibl cina la fin dl 2015: chisc é stá i temesc dla reuniun dl Consëi d’aministraziun dla Fondaziun Dolomites UNESCO, cun a cé l’assessur dl’ambiënt Richard Theiner, inier (jöbia ai 19 de novëmber) a Ampëz.
La pröma verjiun dl documënt che reverda le turism é gnüda elaborada da Cesare Micheletti en colaboraziun cun l’EURAC adöm cun les cinch provinzies che fej pert dl raiun metü sot a sconanza dal UNESCO sciöche patrimone mondial dl’umanité. „Le plann sön n turism sostenibl – sotlignëia l’assessur Richard Theiner – é le passaje plü important dla strategia generala de gestiun dles Dolomites che gnará ejaminada tl 2016 dal’UNESCO che fajará n’ispeziun sön le teritore. Le Consëi d’aministraziun dla Fondaziun á dé so arat positif ala verjiun presentada, che messará ciamó gní laurada fora cina la fin dl’ann por rové a n test definitif.“
Nia ma le turism, mo ince la mobilité sostenbila é stada tl zënter dla sentada da inier dl CdA dla Fondaziun Dolomites UNESCO, cun n percurs che dess porté cina le proscim isté ala fondaziun de na plataforma digitala nöia sön le trasport publich. Al se trata de n portal internet che dess contigní dötes les informaziuns sön i orars y i sorvisc dl trasport publich de dötes cinch les provinzies interessades por ti alisiré insciö la chirida ai zitadins y ai ghesć dl raiun dles Dolomites. Tres por ci che reverda la mobilité á le Consëi d’aministraziun aprové le stüde sön le trafich söi jus dles Dolomites fat dal EURAC che gnará tosc ince publiché sön la plata internet www.dolomitiunesco.info.
Tosc da lí do sön internet sará ince le documënt final dla seria de incuntades #DOLOMITES2040 che á coiü adöm les idees y propostes por le dagní dles Dolomites patrimone UNESCO. Implü él ince gnü aprové dal CdA dla Fondaziun le program cun les ativités y la planificaziun economica por le 2016 y la dezijiun definitiva da surandé dötes les competënzes aministratives a n Consëi d’aministraziun rapresentatif nia ma dles cinch provinzies interessades (Südtirol, Trentin, Belun, Udine, Pordenone) mo ince dles Regiuns dl Venet y dl Friul-Aunejia-Iulia.
rc
