Atualità
Strotöres nöies por l’acoliënza di migranc
La Provinzia á albü tles edemes passades de plü contac cun Comuns desvalies por ci che reverda la realisaziun de storöres ajuntives d’acoliënza por porsones che damana do asil y por sostigní na miú spartiziun di profugs assegná dal govern ala Provinzia.
Por le momënt él indöt 875 porsones che á damané do asil y che ti é gnüdes assegnades ala Provinzia de Balsan sön la basa dles cuotes stabilides dal Govern. Por l’acoliënza dles 875 porsones él metü a desposiziun strotöres d’acoliënza ti Comuns de Balsan, Maran, Mals, Tisens, Vintl, Pfitsch y Bornech.
Cun le fin da realisé na spartiziun plü ecuilibrada di migranc che damana do asil sön döt le teritore dla Provinzia á la Repartiziun Politiches soziales en colaboraziun cun i Comuns ciafé strotöres ajuntives che pó gní adorades por l’acoliënza, ince deache na gran pert di migranc é atualmënter aciasá tl Comun de Balsan.
Incö, vëndres ai 20 de novëmber, gnarál ativé l’acoliënza por 12 porsones che damana do asil tl Comun de Porsenú en colaboraziun cun la Caritas. Dai 23 de novëmber gnarál daurí na strotöra metüda a desposiziun dales monies terziares tl Comun de Ciastel por 19 porsones che á damané do asil. Tl Comun de Eppan vëgnel dötaurel dortoré la Caserma Marcanti olache al ciafará lerch 52 porsones. Tl Comun de Urtijëi vëgnel ince lauré por mët a desposiziun na strotöra d’alberch da privac por 25 porsones che á damané do asil. La popolaziun de Urtijëi gnará informada te na pröma incuntada publica ai 25 de novëmber.
Al vëgn implü ejaminé atres strotöres sön le teritore provinzial che podess gní spo adorades sciöche alberch por porsones che á damané do asil tla Talia y che ti é gnüdes assegandes ala Provinzia aladô dla tlé de spartiziun statala.
rc
