Atualità
Dala Junta: 25 posć por la formaziun spezifica tla medejina generala
La Junta provinziala á aprové incö ( al 1 de dezëmber) la bandida de concurs por l’amisciun al curs de formaziun de medejina generala por la perioda 2016 – 2019. I posć a desposiziun é 25.
25 doturs ará la poscibilité da tó pert al curs de trëi agn dal 2016 al 2019 che reverda la formaziun de medejina generala. La Junta provinziala á aprové incö, al 1 de dezëmber, la bandida de concurs por l’amisciun ala formaziun spezifica. Les döes tomades di termins por presenté les domandes y les döes dates dl concurs gnará comunicades dal Ofize provinzial formaziun dl personal sanitar. Les dates ne é nia ciamó gnüdes stabilides deache ares depënn dal momënt dla publicaziun tl Boletin ofizial dla Regiun. „Cun chësc program nü sarál poscibl da ti dé na basa ciamó plü sigüda a chi che laora tl setur dla medejina generala: döt chësc é n vantaje nia ma por la rëi di doturs sön le teritore mo dantadöt ince por i paziënc“, á dit le presidënt Arno Kompatscher do la sentada dla Junta.
Le presidënt Kompatscher á implü recordé les mosöres aprovades dala Junta por ciafé na soluziun ala nezescité de d’atri doturs tl Südtirol: 35 posć gnará scric fora te n concurs por garantí l’assistënza scrita dant ti reparc de nasciüda y 38 assunziuns sará la resposta ales diretives europeiches nöies che reverda i orars de laur di doturs.
Por la formaziun spezifica tl setur dla medejina general prëibel ciaré sot a:
www.provincia.bz.it/sanita/personale-sanitario/medicina-generale.asp
rc
