Atualità
Trasport publich local: Orars nüs dai 13 de dezëmber
La secunda domënia de dezëmber se müda vigni ann te döta l’Europa i orars dles ferates. „Chësc termin é chësc ann ince na data dër important tl Südtirol, por atualisé sides i orars dles ferates che ince dles corieres y por i adaté ales nezescités“, á splighé l’assessur Florian Mussner. Por le pröm iade él gnü presenté chësc ann na suraodüda anuala di orars dl trasport publich, insciö Mussner.
„Deache la domanda de anuzamënt dl trasport publich local crësc te tröc raiuns de nosta Provinzia gnará la rëi dles corieres y dles ferates ampliada, dantadöt ince defora di orars de laur“, spliga l’assessur Florian Mussner. Öna dles novités plü importantes cina dezëmber 2016 é insciö l’ampliamënt dla frecuënza dl passaje ti mëisc da d’invern de na ferata de vigni mesora sön la linia de Puster cina Sillian. Pro les corieres él da alzé fora, danter l’ater, le passaje de vigni ora d’isté sön i jus dles Dolomites y la continuaziun dla linia dl Überetsch Express cina Kaltern d’isté, plü iadi sön dla furnadoia dla Mendel.
„I orars dles corieres dl sorvisc publich é da plü agn costanc, naturalmënter tolon tres en conscidraziun les esigënzes sajonales y chëres tratan l’ann de scora, sciöche ince dla sajun dai schi y da d’isté“, sotlignëia l’assessur Mussner. „Pro l’atualisaziun anuala nen vara sëgn dla coordinaziun di orars de partënza, dla otimisaziun di coliamënc y de adatamënc ales esigënzes“, insciö Mussner.
Corieres: Les novités plü granes tles valades ladines y ti raiuns vijins
Les linies dles corieres 177 y 178 tl raiun de Tagusens – Sëuc - Ciastel – San Osvald gnará metüdes adöm te öna na linia 177, implü gnarál spartí sö la linia 180 te döes linies 180.1 (Vich – Nueva Ladina – Balsan) y 180.2 (Baissiston – Nueva Todëscia – Balsan). Al gnará ince aumenté le numer di iadi dla linia dles corieres 351 Tlüses – Laiun – Urtijëi y dla linia dles corieres 346 Tlüses – Pruca – Barbian.
La linia dles corieres danter Porsenú cina Tlüses/Funes jará sëgn döt l’ann cina Santa Magdalena. Plü corieres sará ince en forza tratan l’isté sön la trata Funes – Börz (linia 339).
Na sauridanza importanta sará l’aumënt dl’oferta sön i jus dles Dolomites cun le passaje de corieres vigni ora danter Gherdëna- Pordú, Gherdëna-Corvara y Gherdëna-Ju de Sela (Linia 471) sciöche ince Corvara – Reba – Pordú (linia 472).
Implü vëgnel arlungé bele dala fin de má inant la linia 442 danter Toblach y Braies cina le lech de Braies, la linia 444 danter Toblach y les Trëi Pizes de Lavarëi passará vigni 15 menüc impede vigni trënta menüc. Le conzet nü dla linia dles corieres 446 danter Toblach y Le Sest cun döes trates ne á nia albü suzes y an jará zoruch indô ala verjiun da denant.
Ferates: Cadënza de vigni mesora cina Sillian / Plü „Frecce“ cina Roma
Por le pröm iade vëgnel arlungé chësc invern la cadënza de vigni mesora cina Sillian (Tirol dl Ost). „La gran domanda d’anuzamënt dla linia de Puster y i coliamënc direc ai raiuns da jí cun i schi de Plan de Corones y dles Dolomites dl Sest é por nos na buna rajiun por aumenté i coliamënc cun les ferates ince tratan la sajiun da d’invern“, á sotligné l’assessur Florian Mussner. Tla perioda temporala danter i 13 de dezëmber dl 2015 cina ai 3 de aurí dl 2016 gnarál insciö garantí n coliamënt diret danter Franzensfeste y Sillian vigni mesora y vigni ora danter Franzensfeste y Lienz. „Insciö sarál ince poscibl da colié i raiuns da jí cun i schi cun les staziuns dla ferata de Percha/Plan de Corones y de Vierschach-Helm vigni mesora. Chësta é na gran ocajiun por s’anuzé dla mobilité sostenibla ince tratan le tëmp lëde“, insciö Mussner.
Plü coliamënc danter Balsan y Roma gnará ince pité dala „Frecciargento“: Dai 13 de dezëmber inant gnarál pité cater coliamënc por direziun. Vëndres, sabeda y domënia sarál indöt cinch ferates por direziun che coliará Balsan cun Roma cun n tëmp de iade de indöt cater ores y mesa.
rc
