Atualità
Dala Junta: aprové le pachet de mosöres sön separaziuns y devorc
Sostigní abonora y acomagné cun profescionalité les families atocades da chestiuns de separaziun: chisc é i obietifs primars dl pachet de mosöres contignü tl proiet „Families plü stersces“ dl’Agenzia provinziala por la familia, aprové incö (ai 2 de forá) dala Junta provinziala.
Aladô dles statistiches se röia tl Südtirol vigni 4 matrimoni cun na separaziun y vigni ann él insciö söporjö 500 mituns sot ai 18 agn che vëgn atocá da situaziuns de separaziun o devorz di geniturs. Por daidé les families bele abonora te chëstes situaziuns de dificolté y por podëi ti pité n sostëgn profescional á la Junta provinziala aprové, sön proposta dl’assessuria Waltraud Deeg, n pachet cun mosöres de sostëgn che reverda le tema dla separaziun y di devorc. Chësc catalogh prevëiga danter l’ater le renforzamënt di sorvisc ti raiuns soziosanitars por ti garantí ales familes n aiüt diret, asvelt y zënza complicaziuns burocratiches, n’ampla consulënza iuridica, pedagogica, psicologica, finanziara y organizativa.
„I consulënc de familia pita te chësc setur bele dötaurela de plü sorvisc de gran valüta – á sotligné l’assessuria competënta Deeg – y sëgn nen jarará da renforzé y amplié ciamó deplü les ressurses desponibles por podëi mëte a desposiziun n aiüt asvelt y por evité insciö bele abonora la creaziun de conflic te familia.“ L’obietif é chël da svilupé standarg y prozedöres unitares y da ti assiguré insciö n sostëgn y na consulënza profescionala y de livel alt ales families.
Implü gnarál ince metü a desposiziun sön la plata internet dl’Agenzia provinziala por la familia na panoramica de dötes les ofertes de consulënza cun material d’informaziun y sensibilisaziun sön la tematica. Na novité che vëgn lapró reverda ince n percurs de sauridanzes por alisiré la comunicaziun danter les istituziuns interessades (tribunal, curt, avocac, raiuns soziosanitars, zëntri de consulënza, la garanta por l’infanzia y adolescënza, scores y scolines, y.i.i.). Chësc model interdisciplinar, dal inom „Pratica Cochemer“, vëgn ince bele adoré cun suzes tla Germania por afronté situaziuns de crisa danter geniturs por smendrí i conflic y por che i mituns pois mantigní na buna relaziun cun trami dui i geniturs ince do la separaziun. „Al é nezesciar da potenzié la colaboraziun danter les perts interessades, dantadöt tl interes di mituns. Al é i pici che á gonot les majeres dificoltés te chëstes situaziuns“, insciö Deeg.
Les mosöres aproades dala Junta provinziala gnará sëgn atuades en colaboraziun cun i departimënc provinziai Sanité y sozial, Formaziun, Promoziun dl stüde y integraziun. Tl medemo momënt laora ince l’Agenzia por les familes bele a n secundo catalogh cun mosöres tl contest dl proiet „Families plü stersces“, che reverda la perioda dla gravidanza cina al terzo ann di mituns.
rc
