Atualità
Dala Junta: comisciun por l’avalianza dles oportunités, ok al program 2016
La Junta provinziala á ince aprové incö (ai 2 de forá) te süa sentada edemala le program 2016 dla Comisciun por l’avalianza dles oportunités. De plü é les scomenciadies planificades, danter l’ater ativités de sostëgn a proiec che reverda l’avalianza di sesc y na revalutaziun dla imaja dles ëres ti media.
La Comisciun por l’avalianza dles oportunités é n organ de consultaziun dla Junta provinziala por ci che reverda l’avalianza danter ël y ëra y la promoziun dles ëres. Implü sostëgn ince la Comisciun, en colaboraziun cun l’Ofize Ëres dla Provinzia, bele da 25 agn proiec, campagnes y ativités de sensibilisaziun diretamënter söl post. Incö, mertesc ai 2 de jená, á le govern de Palaz Widmann aprové le program dles scomenciadies por l’ann 2016, „n program – sotlignëia la presidënta Ulrike Oberhammer – che á le focus sön la formaziun y informaziun. La seria de incuntades „Ëres informades“ gnará te chësc contest ampliada cun l’idea da istituí propi n’academia feminina.“
N’atra tematica importanta sará ince chëra che reverda l’imaja dles ëres ti media cun la creaziun de n pest por che che se dará jö cun ativités de sensibilisaziun te chësc setur. Preodü él ince n codesc etich y l’istituziun de n mëis „Equal Media“. Implü gnarál ince lauré tresfora sön les tematiches y proiec de dorada lungia che reverda le monn dl laur, le scombatimënt dla violënza cuntra les ëres, la medejina de jëne y tröp de plü. „Por ci che reverda l’avalianza dles oportunités – insciö l’assessuria competënta Martha Stocker - á le Südtirol bele fat tröc vari inant ti ultims agn mo al é ciamó meso da mioré dër tröp. Öna dles priorités sará proscimamënter chëra da mioré la colaboraziun por ci che reverda les tematiches dles ëres nia ma tl Südtirol, mo ince sura i confins provinziai fora.“
rc
