Atualità

Museums | 21.03.2016 | 16:07

De di Museums dl Südtirol danter cultura y dialogh

Söporjö 120 operadus di museums che vëgn da döta la Provinzia s’á incunté incö, en lönesc ai 21 de merz, al Messner Mountain Museum Firmian en ocajiun dl De di Museums dl Südtirol, le convëgn spezialisé organisé vigni ann dala Repartiziun Museums. De plü é stá i intervënc proponüs tl contest dla tematica „Museums danter cultura y dialogh“.

Promöie le svilup dl panorama museal local, favorí le networking danter i museums, ti pité motivaziuns ai colaboradus y ti ofrí n’ocajiun de formaziun y confrunt: chisc é i obietifs dl diejimo De di Museums dl Südtirol, le convëgn spezialisé anual organisé dala Repartiziun Museums dla Provinzia autonoma de Balsan. La manifestaziun é gnüda daurida incö, lönesc ai 21 de mert, dal assessur por i museums Florian Mussner che á sotligné l’importanza dl rode di museums por la sozieté, dantadöt por i jogn y les families. „Implü á i museums ince n rode important por l’elaboraziun de tematiches che reverda la vita de ëi y ëres dl tëmp passé, dl presënt y dl dagní“, á recordé Mussner.

I dui ejëmpli che é gnüs presentá da plü daimpró tratan l’incuntada da incö é stá le Messner Mountain Museums y le festival cultural „septimo“ di museums dl Montafon (Vorarlberg, Austria). Magdalena Messner, coordinadëssa dl Messner Mountain Museum y möta dl fondadú Reinhold Messner, á ilustré les carateristiches spezifiches di sis museums che reverda te na manira particolara la tematica dles munts. Michael Kasper, diretur dl’area scientifich-culturala dl consorz di Comuns dl Montafon, á spo splighé les carateristiches dl festival inovatif „septimo“ (September in Montafon“) organisé tl Vorarlberg sciöche ejëmpl de suzes por colié i museums a so contest cultural.

Implü á ince la direturia dla Repartiziun provinziala Museums Karin Dalla Torre presenté les manifestaziuns plü importantes che vëgn organisades chësc ann y le percurs preodü de na lege provinziala söi museums nöia. Le De di Museums dl Südtirol é ince sté l’ocajiun por fá n ressüme dla campagna dl ann passé „Young & Museum“ cun indöt 3.000 studënc che s’á anuzé dla posciblité da vijité i museums debann tratan l’isté. N ater proiet che é gnü tematisé tratan la manifestaziun é sté le proiet artistich partezipatif „MuJuK“ che á l’obietif da motivé la jonëza da se dé jö cun i museums y sü contignüs.

rc

Galaria dales fotografies

La curadëssa Magdalena Messner á presenté incö le conzet general di sis Messner Mountain Museums en ocajiun dl De di Museums dl Südtirol.

L'assessur por i museums Florian Mussner á ince tut pert al De di Museums dl Südtirol incö a Balsan.
Foto: Repartiziun Museums

Tl contest dl proiet artistich MujuK á n grup de jogn realisé n radiodramma che ai á presenté incö tratan l'incuntada a Balsan.
Foto: Repartiziun Museums