Atualità
Dala Junta: barat dla caserma a La Ila cun la ex-porjun a Porsenú
La Junta provinziala á aprové les operaziuns de barat danter Stat y Provinzia che reverda la caserma di Carabinieri a La Ila cun la porjun da denant a Porsenú.
Tl contest dl protocol d’acordanza cun le Stat por na destinaziun desvalia de strotöres dla segurëza publica á la Junta provinziala aprové incö les operaziuns de barat che reverda la caserma di Carabinieri da La Ila y la porjun da denant a Porsenú. Tl 2011 â la Provinzia sotescrit n protocol d’acordanza cun le Minister dl Intern y l’Agenzia dl demane che reverda les forzes de polizia: da öna na pert por ti garantí ales forzes dl ordin sëntes nezesciares tl Südtirol y dal’atra pert por la cumpra de bëgns statai nia plü adorá.
Sön la basa de chësc protocol á le grup de laur stabilí döes priorités nöies: öna reverda le passaje dala Provinzia al Stat dl frabicat che ospitëia atualmënter la sënta dla staziun di Carabinieri a La Ila, y porchël ciafa la Provinzia dal Stat le frabicat dla porjun da denant a Porsenú. Do les tratatives y les sciazades á la Junta aprové incö (ai 03 de ma) la prozedöra de atuaziun por le barat de valur valif dla caserma di Carabinieri a La Ila cun la porjun da denant a Porsenú.
Tl concret él preodü trëi passaji: la sotescriziun dl contrat de cumpra por la sënta atuala dla staziun di Carabinieri, che la Provinzia cumpra dal Comun de Badia, che é atualmënter le proprietar; daldô la sotescriziun dl contrat de barat danter la Provinzia y l’Agenzia dl demane, cun chël che la Provinzia ti surandá sciöche barat al Stat la staziun di Carabinieri da La Ila y che ciafa sciöche retüda le frabicat dla porjun da denant a Porsenú, y ala fin la sotescriziun dl contrat de cumpra danter la Provinzia y le Comun de Porsenú, cun chël che la Provinzia ti vënn al Comun le frabicat dla porjun da denant. L’import dl’operaziun che reverda i dui imobiliars é gnü fissé a 2,4 miliuns de euro.
„Le Comun de Porsenú podará sëgn realisé tl frabicat dla porjun da denant la biblioteca comunala nöia. Al é n vare important ince deache la sënta atuala dla biblioteca ne é nia plü buna da respogn al gran numer de vijites di leturs vigni de“, á dit le presidënt Arno Kompatscher do la sentada dla Junta.
rc
