Atualità
Parcs naturai tl Südtirol, colaboraziun cun „Roter Hahn“
Ara vëgn renforzada la colaboraziun danter i parcs naturai dl Südtirol cun le proiet „Roter Hahn“ dla Lia di paurs. Danter les scomenciadies de plü escursciuns.
Sostenibilité, belëza dla contrada y dles vacanzes söi lüc da paur, tradiziuns y usanzes: chisc é i valurs che coliëia i parcs naturai dl Südtirol cun le proiet „Roter Hahn“ che acorpëia te na rëi düc i agriturisms dla Lia di paurs südtiroleja (Bauernbund). Da agn á l’Ofize Parcs naturai dl Provinzia scomencé na forma de cooperaziun che á porté, danterlater, a na seria de scomenciadies organisades pro les Ciases di Parcs naturai, sciöche ince por ejëmpl tl mëis d’aurí a Al Plan de Mareo pro le Parch natural Fanes-Senes-Braies. „Da öna na pert ti vëgnel pité ai mëmbri dl Roter Hahn la poscibilité da conësce damí le monn di set parcs naturai dl Südtirol, dal’atra pert é chësta colaboraziun ince n contribut por amplié le messaje de sconanza dl paesaje: i agriturisms rapresentëia insciö na fontana de contac dirëta cun i ghesć y ai é promoturs de n comportamënt sensibl y respetus tl confrunt dla natöra“, sotlignëia le diretur dl Ofize Enrico Brutti.
Por ci che reverda l’ann atual sará les scomenciadies resservades ai mëmbri dl Roter Hahn döes escursciuns desvalies: la pröma iniziativa é gnüda a se le dé ti ultims dis al’intern dl Parch natural Sciliar-Ciadinac cun l’acompagnadú Riccardo Insam che á porté i partezipanc ala scoverta dla flora, la secunda scomenciadia sará indere tl mëis de setëmber pro le Parch natural Fanes-Senes-Braies. „La colaboraziun vëgn dër arpijiada da nüsc sozi y i sun sigü che la colaboraziun jará inant ince tl dagní“, spliga Hans Kienzl, le diretur marketing dl Roter Hahn Hans Kienzl.
Les vijites acompagnades al intern di set parcs naturai dl Südtirol ne é nia n’estlusiva dl Roter Hahn: düc i ghesć y i apascioná dl jí sö por munt pó tó pert ales scomenciadies programades fora por döt l’isté. Por plü informaziuns él poscibl da vijité la seziun aposta dles escursciuns acompagnades sön la plata internet di Parcs naturai dla Provinzia.
rc
Galaria dales fotografies
