Atualità
Personal tles scolines, tl vers de n’acordanza cun i sindacac
Incuntada cun i sindacac sön la chestiun dl personal dles scolines. I assessurs Achammer y Deeg laora tl vers de n protocol d’acordanza.
La situaziun che reverda le personal dles scolines tl Südtirol é stada la tematica zentrala dl’incuntada danter i assessurs provinziai Philipp Achammer y Waltraud Deeg y i rapresentanc dles scolines, dles scores y di sindacac de categoria. La chestiun prinzipala reverda la domanda de aumënt de personal, mo nia ma, y la prozedöra sön chëra che al é gnü stabilí n percurs deboriada dles döes perts é chëra da concordé i proscims vari por jí inant tla tratativa.
„Daimpröma él important da sotligné le reconoscimënt dl fat che l’acordanza sön le contrat transitore, che prevëiga la diminuziun dl orare de laur, rapresentëia n pröm segnal important por jí inant cun les tratatives“, insciö l’assessur Achammer che dij inant: „Te n secundo vare gnarál spo confermé la garanzia de atri 24 posć sön la planta organica y spo gnarál ince inrescí la poscibilité da mët a desposiziun de plü ressurses a bëgn dles scolines.“ Aladô di assessurs Achammer y Deeg „podarál pié ia concretamënter les tratatives n iade che le protocol d’acordanza é gnü firmé.“
Tratan l’incuntada á i rapresentanc dles organisaziuns sindacales recordé les ghiranzes che reverda „plü segurëza por le personal dles scolines, na soluziun di problems de prescia y n svilup prezis dles strategies de dorada mesana-lungia“. Da chësc punt de odüda á l’assessur Achammer sotligné da ne orëi nia fá „impormetüdes che ne vá nia da mantigní“, y l’assessuria Deeg á recordé che al é important da dialoghé te na manira costrutiva por mioré la situaziun. „Sön la tematica él important da avëi na idea che tól en conscidraziun döes les pertes, ince les families“, insciö Deeg.
rc
