Atualità
Entrada por la Val Badia: ajornamënt di cosć por scrí fora i laurs
La Junta provinziala á adaté la lista di prisc atuala che reverda la realisaziun dl’entrada por la Val Badia cun n tunel tla localité Flaurënz.
L’ajornamënt di cosć reverda le proiet de n'entrada nöia por la Val Badia che pëia ia dala ota dla strada statala dla Val de Puster dlungia Ciastel Badia cun n punt sura le lech artifizial „Kniepass“ y che röia spo te n tunel cina Flaurënz, fraziun de San Laurënz. La proietaziun é stada bele elaborada dan da n per de agn y por chësta gaujia él sëgn sté nezesciar da adaté i cosć ai prisc atuai. La publicaziun dla bandida de gara di intervënc é preodüda por la fin dl ann cun scomenciamënt di laurs por i mëisc da d’isté dl 2017. La Junta provinziala á aprové incö ai 4 d’otober sön proposta dl assessur por la rëi stradala Florian Mussner l’adatamënt di cosć dl’opera. Por la realisaziun dl azes ala Val Badia cun na galaria êl preodü, aladô dl proiet elaboré d’inteja cun le Comun y i esperc dla sconanza por l’ambiënt, paesaje y bëgns culturai, n investimënt de 73,4 miliuns che é gnü adaté a 75,5 miliuns de euro atuai.
„Le gran vantaje de chësta soluziun é che al ne sará degönes incrujades, cun chëres che le trafich s’architass, mo insciö sarál poscibl da garantí n flus plü asvelt y linear cun conseguënzes positives sides por i pendolars co i turisć mo ince por l’ambiënt y le paesaje de Ciastel Badia y dla contrada de Puster“, sotlignëia l’assessur Florian Mussner. L’entrada por la Val Badia gnará realisada zirca 400 metri dan le tunel de Ciastel Badia cun strades separades por l’entrada y la sortida cun n’atenziun particolara ince por le paesaje, insciö Mussner.
La strada d’azes ala Val Badia sará arbassada cun n punt sura le lëch artifizial por passé spo sura la linea feroviara surafora cun n tunel sot le col fora por incrujé spo indô la strada dla Val Badia tla localité de Flaurënz. La galaria sará 950 metri lungia y döta la trassa é te na zona zënza de gran disliví. Por smendrí ciamó deplü l’intervënt söl paesaje gnará na pert dla strada curida che incrujëia la strada statala dla Val de Puster. La infrastrotöra nöia sará n alisiramënt por i abitanc de San Laurënz y Flaurënz.
rc
