Atualità
Dala Junta: ok al plann de svilup por la mobilité sostenibla
Smendrí le trafich, le sposté y mioré l’intermodalité: chisc é i obietifs dl plann de svilup por na mobilité plü sostenibla, aprové incö dala Junta.
Sön la strada tl vers de na regiun ejemplara tl setur dla mobilité alpina sostenibla á la Junta provinziala aprové ai 25 d’otober n Plann strategich por l’e-mobility cun n pachet de mosöres da atué ti proscims sis agn y che reverda plü seturs strategics, dal’adoranza dles rodes cina ala mobilité eletrica. Le plann é gnü realisé dal grup de laur dla Green mobility istituí dala Junta provinziala cun a cé Florian Zerzer, le diretur de Departimënt Ambiënt y Energia.
Dl’atuaziun dles mosöres se crüziará le Departimënt provinzial Economia, adöm a chël dl’Energia y Ambiënt en colaboraziun cun le Departimënt Mobilité y Viabilité. Danter i punc da concretisé él le smendrimënt dl trafich cun intervënc de planificaziun teritoriala y strotorala, da sposté le trafich cun n sostëgn ales rodes, ai mesi publics y al’intermodalité y le mioramënt dl trafich tres le potenziamënt dles infrastotöres y la promoziun dla mobilité eletrica.
La mobilité sostenibla é n pilaster fondamental por n raiun modern y atratif mo ince n vantaje por le Südtirol sciöche destinaziun turistica. „Porchël él nosc obietif da potenzié y svilupé inant la mobilité sostenibla cun na politica de promoziun mirada y de dorada lungia“, sotlignëia le presidënt dla Provinzia Arno Kompatscher. L’assessur por l’ambiënt Richard Theiner recorda che „la mobilité vërda contribuësc, adöm al’energia renovabla, a arjunje i obietifs dl clima. Porchël él nosc dovëi da ti dé la prezedënza ai mesi de trasport che incuinëia demanco“, insciö Theiner. Por sostigní i zitadins tla converjiun a na mobilité che é plü compatibla cun l’ambiënt, „gnarál amplié l’oferta dl sorvisc dl trasport publich, al ganrá lauré por garantí strades sigüdes y la combinaziun de formes desvalies de mobilité“, prezisëia l’assessur competënt Florian Mussner,
Ala conretisaziun dles mosöres spezifiches ál lauré para ince l’APPA, le Consorz di Comuns, l’Uniun energia Südtirol SEV, le Zënter por l’idrogen IIT, l’Alperia, la STA y l’organisaziuN Carsharing. Le grup de laur é sëgn gnü inciarié da lauré inant sön chësc percurs por arjigné ca na delibera che gnará aprovada dala Junta provinziala cun le pachet de dötes les mosöres che gnará tosc presenté te na conferënza stampa aposta.
rc
